Almatyda aryqtar jelisin jóndeýge 600 mln jýyq teńge bólinedi

ALMATY. QazAqparat - Almatyda aryqtardy jóndeý jáne jańadan aryqtar salý jumystaryna 600 mln jýyq teńge bólinedi. Bul týraly búgin 6-shy shaqyrylymdaǵy qalalyq máslıhattyń 7-shi sessııasynda qalalyq Ekonomıka jáne bıýdjettik josparlaý basqarmasynyń basshysy Maqsat Qıqymov málimdedi.

«Almatyda kóbeıgen nóser jaýyndar aryq jelisindegi kemshilikterdi aıqyn kórsetip berdi. Qalada aryq jelisiniń 50 paıyzy qanaǵattanarlyqsyz kúıde. Osyǵan baılanysty, 495 mln teńgege 18,2 shaqyrymdyq aryq jelisine aǵymdaǵy jóndeý jumystaryn júrgizý josparlandy. Bul, bıyl «Almaty qalasyn damytý-2020» baǵdarlamasynyń «Jaıly qala» atty birinshi basymdyǵynyń «Taza qorshaǵan orta» baǵyty boıynsha júzege asyrylady. 

Sondaı-aq, qalaǵa qosylǵan eldimekenderde jalpy somasy 95,4 mln teńgege 72 shaqyrymdyq aryq jelisin qaıta qalpyna keltirýge jáne jańadan 194 shaqyrymdyq aryq jelisin salýǵa qatysty joba-smetalyq qujattama ázirleý josparlandy», - dedi M. Qıqymov.

Onyń aıtýynsha, bul sharalar aldaǵy ýaqytta nóser jaýyndar kezinde sý basý oqıǵalaryn boldyrmaýǵa jáne qalalyqtarǵa qolaıly jaǵdaı jasaýǵa múmkindik beredi.  

Bul qarajattan basqa, Dýman shaǵyn aýdanynda aýmaǵy 92 gektar jerdegi jańa zıratty qorshaý, retke keltirý jumystaryna - 37,4 mln teńge, Shyǵys aınalma joly boıynda 3 myń tal-shilikter otyrǵyzýǵa - 29,8 mln teńge bólinedi.   

Sonymen qatar, 2 mektepti, №9-shy qalalyq emhanany jáne Psıhıkalyq densaýlyq ortalyǵyn seısmıkalyq turǵyda nyǵaıtý jáne osy ortalyqqa japsarlas úı-jaı salýǵa - 977,8 mln teńge bólindi. Al, «Turǵyn úı-kommýnaldyq sharýashylyǵynyń senimdi ınfraqurylymy» baǵytynda energetıka jáne kommýnaldyq sharýashylyq salasyna qosymsha - 2,4 mlrd teńge bólý josparlandy. Onyń ishinde - 1,3 mlrd teńge sýmen qamtamasyz etý jáne sý tartý júıesin damytýǵa jumsalady.