Almatyda aryqtan tabylǵan náresteniń ómirine qaýip tónip turǵan joq – dárigerler
ALMATY. QazAqparat – Almatyda aryqtan tabylǵan náresteniń ómirine qaýip tónip turǵan joq. Bul týraly qalalyq Qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.
«Keshe túngi saǵat 00:38-de Raıymbek dańǵylynda ornalasqan «Maxima» oıyn-saýyq saýda ortalyǵynyń mańyna jedel medıtsınalyq járdem qyzmetine shaqyrtý tústi. Oqıǵa ornyna jetken mamandar salmaǵy 3 keli, boıy 52 sm bolatyn jańa týǵan nárestege alǵashqy medıtsınalyq kómek kórsetip, birden balalarǵa shuǵyl medıtsınalyq kómek kórsetý ortalyǵyna jetkizdi. Qabyldaý kezinde balanyń jaǵdaıy gıpotermııaǵa baılanysty aýyr bolǵan (dene temperatýrasy 34,5). Qazir jaǵdaıy ortasha, dene temperatýrasy qalypty. Náreste belsendi túrde ózdiginen eme alady»,– dep habarlady basqarmadan.
Qazir jańa týǵan náresteni № 2 balalar aýrýhanasyna aýystyrýǵa daıyndap jatyr. Ol jerden tolyq tekserilgennen keıin balalar úıine jiberiledi.
Buǵan deıin, Almatyda aryqtan jańa týǵan náreste tabylǵany týraly jazǵan bolatynbyz.
