Almatyda aryqtan tabylǵan áıeldi kúıeýi óltirgen bolýy múmkin
ALMATY. QazAqparat - Almatyda aryqtan tabylǵan 26 jastaǵy áıel óz kúıeýiniń qolynan qaza tapqan bolýy múmkin. Bul týraly QazAqparat tilshisine qara jamylǵan otbasynyń dostary habarlady.
«Bul kelinshek sol jerdegi úılerdiń birinde qart kisilerdi baǵatyn. Ony kúıeýi óltirdi. Bir kún buryn. Jumys isteıtin ornyn bilip alyp, sol adreske baryp, shaqyrǵan. Shyqqan kezde óltirip tastaǵan. Áıeldi bireýler zorlamaq boldy degen oı qalyptastyrǵysy kelip, sheshindirip ketken. Anasynyń aıtýynsha, qyzynyń táni kók-ala qoıdaı eken. Saý tamtyǵy qalmaǵan. Áıeldi jumysqa alǵan adamdardan estigenimizdeı, soqqydan áıeldiń bir qulaǵy jyrtylyp ketken»,- dedi otbasynyń tanysy Valentına Soboleva.
Onyń aıtýynsha, áıeldiń 6 jastaǵy uly jetim qaldy.
«Olar sońǵy jyldary ajyrasyp ketken. Birge turmaıtyn. Kúıeýi áıeliniń artyq qylyǵy bolmasa da, qatty qyzǵanatyn. Jáne balany alyp ketem dep qorqytatyn. Marqum kelinshek otbasyn asyraý úshin qandaı jumys bolsyn isteýge tyrysatyn», - dedi ol.
Sońǵy jyldary qaıtys bolǵan kelinshek anasymen birge "Aıgerim" shaǵyn aýdanyndaǵy jeke úılerdiń birinde páter jaldap turyp kelgen.
Polıtsııa aýladaǵy kameralar arqyly kúdiktini izin sýytpaı ustaǵan. Er adam óz kinásin birden moınyna aldy.
Kisi qolynan kóz jumǵan kelinshekti keshe Qaskeleńdegi týysqandary jer qoınyna tapsyrdy.
Qalalyq polıtsııa atalǵan qylmysqa qatysty tergeý qupııasyn saqtaý maqsatynda jaq ashpaı otyr.
Aıta ketý kerek, 9 shilde kúni ál-Farabı kóshesindegi aryqtardyń birinen jas áıeldiń denesi tabylǵan bolatyn.
