Almatyda aryq jelileriniń jaǵdaıyn zertteý úshin robot qoldanylady

ALMATY. QazAqparat- Qubyrjoldardy zertteý úshin ekologııa jáne qorshaǵan orta basqarmasynyń mamandary kameramen jabdyqtalǵan, tómengi jıilikte jumys isteıtin jáne qashyqtan basqarylatyn robotty paıdalana bastady, dep habarlaıdy QazAqparat tilshisi.

«Apparatty jergilikti mamandar óz kúshterimen jınap shyǵardy. Dóńgelektiń kómegimen jyljıtyn kishigirim robot qoljetimsiz jerlerden ońaı ótip, sol jerdegi beıneni tikeleı arnaıy monıtorǵa shyǵarady. Sonymen qatar apparat telemetrııa málimetterin ıilý buryshy men tik kúıinde de kórsetedi. Qurylǵynyń kómegimen lastaný deńgeıimen qatar qubyrdaǵy korrozııa, jarylý jáne taǵy basqa aqaýlaryn anyqtaýǵa bolady»,- dep habarlady qalalyq ákimdikten.

Qala ákimdigi atap ótkendeı, qazirgi kezde aryq jelisin qalpyna keltirý jáne olardy kollektorlarmen baılanystyrý jumystary júrgizilip jatyr. Sonymen qatar aryq jelileriniń sýarý múmkindigin de qalpyna keltirý qolǵa alynǵan. Aryq jelilerin jóndeý jáne qaıta qurý jumystary boıynsha tıisti jobalaý esepteý qujattamasy ázirlendi. Keıbir jerlerde aryq jelilerin keńeıtý josparlanǵan.

Qalada tyǵyz qurylystyń júrgizilýine baılanysty aryq jelisin salýǵa múmkindik joq jerlerde sý basýdy boldyrmaý úshin sý aǵynyn bólý jumystary júrgizilýde. Jyldyń sońyna deıin 56 sý basý aýmaǵynda kollektor júıesin iske qosyp, aryq jelisimen baılanystyryp, apatty qalpyna keltirý jumystaryn júrgizý josparlanǵan.

«Almatyda sý basýdyń negizgi sebebi aryq jelisinde jaýyn jáne erigen qar sýyn ótkizý múmkindiktiń joqtyǵynda jáne kollektor-káriz júıesiniń nashar bolýynda. Qoldanystaǵy kollektorlarǵa kóp jyldan beri tıisti qyzmet kórsetilmegen»,- delingen habarlamada.

Qalada barlyǵy 16 kollektor bar, onyń 12-i jaramsyz, tórteýi tek 30%-ǵa jumys istep tur. Bıyl jalpy uzyndyǵy 376 km aryq jelisin salý jáne qaıta qurý jumystary bastaldy.