Almatyda aryq jelilerin salý jumystary jalǵasýda
ALMATY. QazAqparat - Almaty ákimi Baýyrjan Baıbek jumys sapary aıasynda qalanyń aryq jelilerin salý men olardy jóndeý, sonymen qatar arna ańǵarlaryn nyǵaıtý jumystarynyń barysyn tekserdi, dep habarlaıdy QazAqparat tilshisi.
Qalalyq ákimdiktiń baspasóz qyzmeti habarlaǵandaı, Baýyrjan Baıbek Alataý aýdanynyń «Alǵabas» yqsham aýdanyndaǵy Teılov, Momyshuly, Soqpaqbaeva, Qaldaıaqov, Lermontov, Sátpaev, Mametova, Bajanova, Abaı, Baıtursynov jáne Rysqulov kósheleri boıyndaǵy aryq jelisin salý men qurǵatý júıesiniń jumysyn baqylady.
Yqshamaýdanda uzyndyǵy 7 shaqyrym bolatyn aryq arnalaryna lotoktar tóselip jatyr. Tereńdigi 2 shaqyrym, al uzyndyǵy 2 shaqyrym bolatyn jekelegen ýchaskelerdegi transheıalarǵa drenajdy qubyrlar tartý jumystary júrip jatyr. «Teploenergetık» jáne «Energostroıtel» saıabaqtary arqyly aǵatyn Qarǵaly ózeniniń jekelegen ýchaskelerinde tazartý, jóndeý jáne qalpyna keltirý jumystary da qarqyn alǵan.
Almaty ákimi Naýryzbaı aýdanyndaǵy Nadyrov, Tajıev, Qulybekov, Slanov kósheleri boıymen ótetin uzyndyǵy 4 shaqyrymnan asatyn aryq jelisiniń qurylysyn da tekserdi.
Aýdan ákimi Saıran Saıfedenov buryn bul kóshelerde aryq júıeleriniń bolmaǵanyn, búgingi kúnge deıin 1,3 shaqyrym jerge jańa aryq jelileri men jaýyn kanalızatsııasy tartylǵanyn aıtty.
Qala bıligi aryqqa qatysty jumystardy bıyl qazanda aıaqtamaq.
Jalpy alǵanda, Almatyda bıyl uzyndyǵy 14,7 shaqyrym aryq jelisi salynyp, 52 kóshedegi 42,2 shaqyrym aryq qaıta jasalýda.
Atap óterlik jaıt - budan ózge segiz aýdan ákimdiginen uzyndyǵy 500 shaqyrym bolatyn 488 kóshede jańa aryq pen jaýyn kanalızatsııasy qurylysyna JSQ daıyndaý úshin ótinimder túsken.
Almaty ákimi Baýyrjan Baıbek jumys sapary barysynda «Kishi Almaty» ózeni aǵyp ótetin Jetisý aýdanyndaǵy Volochaevskaıa kóshesi boıyndaǵy sý ańǵarlaryn jáne Medeý aýdanyndaǵy Taırov kóshesi men Bostandyq aýdanyndaǵy «Baǵanashyl» yqsham aýdanyndaǵy bıik betkeılerdi nyǵaıtý jumystaryn da tekserdi.
Bul ýchaskelerde gabıondy konstrýktsııalardan jasalǵan qorǵanys qabyrǵalary ornatylyp, jerasty jumystary júrip jatyr.
Jetisý aýdanyndaǵy betkeıdiń uzyndyǵy 345 metr, bıiktigi 7 metrge jetedi. Qazirgi kezde munda qajetti jumystyń basym bóligi aıaqtalǵan, jınalǵan topyraqtyń 90%-y syrtqa shyǵarylǵan. Orta qysymdy gaz júrgizý arqyly tehnologııalyq protsester qamtamasyz etilgen, joǵary qysymdy sý qubyrlary boıynsha demontaj jáne montajdaý jumystary júzege asyp, elektr jelileriniń tirekteri jyljytylǵan.
Osy ýchaskedegi jumysty bıylǵy jyldyń 1 qazanyna deıin aıaqtaý josparlanǵan.
470 metrge sozylyp jatqan Medeý aýdanyndaǵy betkeıde uzyndyǵy 410 metrden asatyn metall qorshaýlar, beton bloktar, aǵashtan salynǵan shaǵyn nysandar alynyp tastaldy. Syrtqa 1600 tekshe metrden astam qoqys shyǵarylǵan. Jumysty bıylǵy jyldyń qazan aıynda aıaqtaý josparlanǵan.
Bostandyq aýdanyndaǵy «Baǵanashyl» yqsham aýdanynda betkeılerdi nyǵaıtý jumystary da kestege saı júrip jatyr, skvajınalar burǵylanyp, topyraqtyń quramy zerttelýde. Jobalaýshylar topyraqtyń seısmıkalyq jaǵdaıǵa tózimdiligi men quramyna qaraı mundaǵy tirek qabyrǵalarynyń túrin jasaıtyn bolady. Qazirgi kezde betkeıi burǵylanyp, odan shyqqan topyraq syrtqa shyǵarylýda. Jumysty bıylǵy jyldyń qazan aıynyń sońyna qaraı aıaqtaý josparlanǵan.
Bostandyq aýdanyndaǵy «Aqtóbe» yqsham aýdanynda úsh jeke turǵyn úı men 12 jer ýchaskesin biriktiretin kópirdi qaıta jasaý jumystary aıaqtaldy. Munda da burynǵy temirbeton qorshaýlar alynyp tastaldy, mnonolıtti temirbetondy qondyrǵylar ornatyldy, ózenniń túbine tikburyshty temirbeton qubyrlarynyń astyna plıtalar tóselip, kópirdiń ústińgi jaǵyna metall qorshaýlar ornatylatyn bolady.
Almaty ákimi Baýyrjan Baıbek kezekti jumys saparynda Naýryzbaı aýdanyndaǵy ákimshilik ortalyqtyń jáne áleýmettik nysandardyń qurylys barysyn, sonymen qatar Qarǵaly ózeni boıynyń abattandyrylýyn tekserdi.
Aıta ketý kerek, qalanyń ınjenerlik-kommýnıkatsııalyq qurylymyn damytý máselesi «Almaty-2020» Damý baǵdarlamasynda jan-jaqty kózdelgen.
Atalǵan qujat 2015 jyly qoǵamdyq talqylaýǵa jiberilip, 2016 jyly qabyldanǵan bolatyn.
Qaladaǵy tótenshe jaǵdaıdy boldyrmaý maqsatynda qala aýmaǵyndaǵy (onyń ishinde qosylǵan) sý qorǵaý jolaqtarynyń, ózenderdiń arnalarynyń, kanaldardyń, sýsharýashylyǵy qurylǵylarynyń jekelegen bólikterin qaıta jańǵyrtýdyń jobalyq-smetalyq qujattaryn ázirleý, qalanyń kishi ózenderiniń arnalarynyń jekelegen bólikterin qaıta jańǵyrtý, sý nysandarynyń sý qorǵaý jolaqtaryn qaıta jańǵyrtý jáne abattandyrý, kommýnaldyq menshiktegi sýsharýashylyǵy qondyrǵylarynyń qyzmetin qamtamasyz etý, aryq jelileri men nóser kárizderin qaıta jańǵyrtý jáne salý kózdelgen.
2020 jylǵa deıin Almatydaǵy barlyq aryqtar jańartylýy tıis.
Ótken jyly ákimdik qyzmetkerleri 1000 shaqyrym aryq jelisin teksergen edi. tekserý barysynda 500 km aryq jelisin aýystyrý kerektigin anyqtaldy.
Bıyl qalada 100 shaqyrym aryq jelisi jańartylsa, kelesi jyly qalǵan 400 shaqyrym aryq jelisi tolyq aýystyrylady.
