Almatyda aryq jelileri men ótkelder tazartylýda

ALMATY. QazAqparat - Almatyda qardyń jappaı erýi aldynda sý basý qaýpin boldyrmas úshin aryq jelileri men ótkelder tazartylýda, dep habarlaıdy QazAqparat tilshisi.

Qala ákimdiginiń málimetinshe, Almaty qalasy aýdandary ákimdikteriniń merdigerlik kásiporyndary jalpy uzyndyǵy 1145,7 km aryq jelilerin jáne ótkelderdi tazartty.

Kún saıyn jumystarǵa 60-tan astam arnaıy tehnıka men 300 qyzmetker jumyldyrylady.

16 myń tekshe metr qoqys pen tunba shyǵaryldy.

Joldyń júris bóligi astynda turmystyq qoqystyń jınalý saldarynan aryqtardan jańbyr sýynyń syrtqa aǵý jaǵdaılary boldy.

Osyǵan baılanysty ákimdik ókilderi nóser sýynyń kedergisiz ótýin qamtamasyz etý úshin qala turǵyndary men qonaqtaryna aryq jelisine qoqys tastamaýdy surady.