Almatyda «Art-Shyǵys bazary» qolóner jármeńkesi ótip jatyr
ALMATY. QazAqparat - Almatyda Ortalyq memlekettik mýzeıde «Art-Shyǵys bazary» qolóner jármeńkesi ashyldy. Jármeńkede erekshe Jańa jyldyq syılyq satyp alýǵa bolady, habarlaıdy QazAqparat tilshisi.
Bul jármeńkege avtorlyq qolóner buıymdary qoıylǵan. «Syılyq aıryqsha bolýy kerek. Qoldanbaly óner ónimderi - alýan túrli forma, ıdeıa men stılderdiń toǵysýy. Kelýshilerdiń nazaryna ulttyq kıimder, kúmisten jasalǵan sándik buıymdar, mýzykalyq aspaptar, tabıǵı materıaldardan jasalǵan kádesyılar, kıiz jáne jibek ónimderi, keneppen salynǵan kartınalar men Jańa jyldyq oıynshyqtar usynyldy», - dedi uıymdastyrýshylar.
Sondaı-aq kórme-jármeńke barysynda mýzeı qonaqtary úshin qysh ydys jasaýdan sheberlik saǵaty uıymdastyryldy. Ony áıgili qazaqstandyq sýretshi-keramıka sheberi Alıasqar Musaev ótkizdi. Al O.Tańsyqbaev atyndaǵy Almaty sándik-qoldanbaly óner kolledjiniń stýdentteri kıiz ben batıkti paıdalanyp buıym jasaýdy úıretti.
Oǵan Qazaqstan, Ózbekstan, Qyrǵyzstan, Tájikstan, Túrkimenstan men Reseıden 150 sheber qatysty. Orta Azııa elderiniń óner jáne qolóner sheberleri Almatyda 16-ret kezdesip otyr. Munda sheberler tájirıbe almasyp, áriptestik sheńberin keńeıtedi.
«Art-Shyǵys bazary» qolóner jármeńkesi 2 jeltoqsanǵa deıin jalǵasady.
