Almatyda arnaıy jasaqtyń kómegimen páter tonaýshylar ustaldy
ALMATY. QazAqparat – Almatyda bótenniń múlkin tonaý isin áshkereleý bóliminiń qyzmetkerleri «Arlan» arnaıy jasaǵymen birlesip qylmystyq topty quryqtady, dep habarlaıdy QazAqparat tilshisi.
Almaty polıtsııa departamenti toptyń 5 múshesi de 30-38 jas aralyǵyndaǵy Shyǵys Qazaqstan oblysynyń týmalary ekenin habarlady. Olar Almatyǵa qylmys isteý maqsatymen kelgen.
«Olardyń árqaısysy buryn bótenniń múlkin urlaǵany úshin birneshe ret qylmystyq jaýapqa tartylǵan. Tonaýshylar toby jerlester qaǵıdasymen qurylyp, megapolıske páterler men úılerdi tonaý úshin kelgen. Olardyń árqaısysynyń óz róli bolǵan. Qylmyskerler úı ıeleri joqta olardyń baspanalaryna jasyryn kirip, aqshalaı qarajattary men qundy zattaryn, altyn buıymdar, qol saǵattary, planshetter jáne t.b. alyp ketken. Jedel-izdestirý sharalary barysynda barlyq qylmysker ustaldy. Qazirgi ýaqytta olardyń qalada bolǵan 6 iske qatysy bary dáleldendi. Ustalǵandardyń barlyǵy ýaqytsha ustaý oqshaýlaǵyshyna qamaldy. Tergeý júrip jatyr», - dedi Almaty polıtsııa departamenti krımınaldyq polıtsııa basqarmasynyń bastyǵy polıtsııa podpolkovnıgi Esen Ysqaqov.
Avtor: Elaman Turysbekov
