Almatyda arnaıy operatsııa kezinde qylmystyq toptan granata, tapansha, pyshaq tárkilendi
ALMATY. QazAqparat – Almaty polıtsııasy qylmystyq topty qolǵa túsirdi, dep habarlaıdy QazAqparat tilshisi.
Qalalyq polıtsııa departamentiniń habarlaýynsha, sotqa deıingi tergeý barysynda Almaty aýmaǵynda qarýdy zańsyz saqtaýmen jáne tasymaldaýmen aınalysatyn top anyqtaldy.
«Soǵan oraı júrgizilgen arnaıy operatsııa barysynda 4 adamnan tapansha, granata, pyshaq tárkilendi. 32-35 jas aralyǵyndaǵy kúdiktiler buryn da qyz zorlap, alaıaqtyq, jalǵan qujat jasap, adam óltirip, qaraqshylyq tonaý jasaǵany úshin isti bolǵan eken. Bul azamattarǵa qatysty tergeý soty tintý týraly sanktsııa shyǵardy. Tintý nátıjesinde zańsyz aınalymnan «RGD-5», tapansha, 4 oq pen pyshaq tárkilendi. Tárkilengen zattar boıynsha ballıstıkalyq jáne daktıloskopııalyq saraptamalar taǵaıyndaldy», - dedi polıtsııadan.
Qazir kúdiktiler ýaqytsha oqshaýlaý ornynda otyr. Polıtsııa olardyń basqa da qylmystarǵa qatysy bar-joǵyn tekserip jatyr.
Almaty qalalyq polıtsııa departamenti QR QK 287-babynyń 3-bólimi boıynsha qylmystyq is qozǵady.
