Almatyda Armenııadan ákelingen qansha kólik tirkeýden ótken joq

ALMATY. QazAqparat – Almatyda Armenııadan ákelingen 165 kólik áli tirkeýden ótken joq. Bul týraly Almaty qalasy polıtsııa departamentiniń basshysy Qanat Taımerdenov óńirlik kommýnıkatsııalar qyzmetinde ótken onlaın brıfıngte aıtty, dep habarlaıdy QazAqparat tilshisi.

«2019 jyly Almaty qalasynyń aýmaǵyna Armenııadan 501 avtokólik ákelingen. 2020 jyldyń 14 tamyzyndaǵy jaǵdaı boıynsha tirkelmegen 165 kólik qaldy. Polıtsııa departamentiniń Call-ortalyǵynyń qyzmetkerleri Armenııadan ákelingen avtokólik quraldaryn tirkeý sharttary týraly habardar etý úshin kólik ıelerine qońyraý shaldy. Esterińizge sala keteıik, bul naýqan osy jyldyń 1 qyrkúıegine deıin jalǵasady», – dedi Qanat Taımerdenov.

Sonymen qatar, ol Armenııadan ákelingen kólikterdi tirkeý úshin qansha qarajat ketetin aıtty.

«Tirkeý sharttary men kólikterge qoıylatyn talaptarǵa keler bolsaq, olar barynsha ońaı jasalǵan. Eń bastysy Armenııadan ákelingen kólikter 1 qyrkúıekke deıin tirkeýden ótýi tıis. Tirkeý kezindegi mindetti tólemderge keletin bolsaq, úsh tólem bar: tirkeý úshin alym – 695 teńge, tehnıkalyq pasport úshin baj – 3 473 teńge jáne memlekettik nómir úshin baj – 7 778 teńge. Tólemniń jalpy somasy 11 946 teńge», – dedi Almaty qalasy Polıtsııa departamentiniń basshysy.