Almatyda Armenııada tirkelgen nómiri birdeı eki kólik anyqtaldy
Megapolıs joldarynda polıtseılerdiń nazaryna «Nissan» jáne «Toyota» Alphard» kólikteri ilikken.
«Eń qyzyǵy – eki kólikte de bir nómir jáne birdeı kólikti tirkeý kýáligi bar. Kólikter Armenııa Respýblıkasynda tirkelgen. Olardy jerlesterimiz basqarady. Belgili bolǵandaı, shaǵyn avtobýs júrgizýshisi Qyzylorda oblysy Jańaqorǵan aýdanyna jolaýshy tasymaldaýmen aınalysady. Ol kólikti birneshe aı buryn Batys Qazaqstanda satyp alǵanyn aıtady. Bul derek boıynsha tekserý jumystary bastaldy», – dedi Almaty qalalyq Polıtsııa departamenti Ákimshilik polıtsııa basqarmasy bastyǵynyń orynbasary Bolatbek Baıatanov.
Polıtsııa ókiliniń aıtýynsha, sotqa deıingi tergeý aıaqtalǵan soń atalǵan kólik júrgizýshileriniń qaısysy jalǵan nómirdi paıdalanǵany belgili bolady.
«Tergeý jáne saraptama nátıjesi shyqqanan keıin QR zańnamasyna sáıkes sharalar qabyldanatyn bolady», – dedi Bolatbek Baıatanov.
