Almatyda Arman Dáýletııarovtyń «Máskeýlik Shyńǵyshannyń tarıhy» atty kitabynyń tusaýy kesildi
MATY. 21 qarasha. QazAqparat /Názıra Eleýhan/ - Búgin Almatyda «Meloman» dúkeninde qala ákimdiginiń qoldaýymen, Mýz-tv telekanalynyń mýzykalyq dırektory, Reseı jáne Qazaqstan mádenı-iskerlik yntymaqtastyǵy halyqaralyq ortalyǵynyń prezıdenti Arman Dáýletııarovtyń «Máskeýlik Shyńǵyshannyń tarıhy» atty avtorlyq kitabynyń tusaýkeseri bolyp ótti. Atalmysh týyndy onyń birinshi avtorlyq kitaby bolyp tabylady.
Kitap Reseıdegi tanymal «AST» baspasynan 3 000 danamen jaryq kórgen. Kitapta Arman Dáýletıarov shoý-bıznestegi qalyptasýy men jeke ómirine qatysty jaıttardy mysalǵa ala otyryp, adam tabys pen mahabbatqa jetý úshin jan-dúnıesiniń náziktigi men tazalyǵyn joǵaltyp almaýy qajettigin aıtady. «Adamnyń bul qasıeti onyń kásibine de, ultyna da baǵynbaıdy», -deıdi avtor. Sondaı-aq, kitap avtory shoý-bıznes tarıhynda tuńǵysh ret óziniń ómir jolynda bastan keshken sezimi, óz-ózińdi tárbıeleý joldary men onyń adam ómirine yqpaly jaıly baıandaıdy.
«Bul meniń dostarym men janyma jaqyn jandarǵa arnaǵan syılyǵym. Men kitapty jazýǵa uzaq ázirlendim, mine armanym oryndaldy. Ózderińiz bilesizder, meniń Reseı shoý-bıznesinde júrgenime 20 jyldan asty, sondyqtan meniń aıtarym kóp. Kitapta osy 20 jyldaǵy ár túrli kezeńderdi, basymnan ótken kúnderimdi, shoý bıznes salasyna kelýim men ondaǵy ómirdiń búgingi shyndyǵyn jazdym. Kitapta sondaı-aq, shoý-bıznestegi ártister men prodıýserler arasyndaǵy kúrdeli qarym-qatynas, mahabbat, otbasy, dostyq pen ómirdegi ózge de qundylyqtar jaıly aıtamyn. Óıtkeni, men úshin juldyzdy ómirdiń sahnadan tys jaqtary men tanymal ártisterdi qarapaıym adam retinde kórsetý mańyzdy boldy»,-dedi kitap avtory Arman Dáýletıarov.
Ol sonymen qatar: «Sizder bul kitaptan Murat Nasyrov jáne Baǵlan Sádýaqasov (A-stýdıo toby) syndy tanymal ánshilerdiń karera jolyndaǵy qıyndyqtary, jalpy olardyń jeke tulǵa retinde qalyptasý tarıhyn oqyp bile alasyzdar. Murat Nasyrov dúnıeden ótkennen keıin BAQ betterinde jaǵymsyz kóp jaıttar aıtyldy. Sondyqtan, men onyń dosy retinde bul kitapta nege olaı boldy? degen suraqqa óz kózqarasymdy bildirdim. Bul ánshilerdiń aramyzdan ketkenine de bes jyldyń júzi bolypty. Olar meniń eń jaqyn dostarym bolatyn. Biz Máskeýge birge attandyq, shoý bıznes baspaldaǵymen birge kóterildik»,-dedi.
Shara barysynda, onyń dosy, belgili ánshi-sazger Batyrhan Shúkenov: «Bul kitap prodıýserlik qyzmettiń qyr-syryn meńgergisi keletinder úshin ǵana emes, ómirde de, karera jolynda baqyt pen tabysqa jetý qupııasyn bilgisi keletinder úshin paıdasy zor»,-dedi. Onyń aıtýynsha, kitapta reseılik shoý-bıznes ómiriniń shyndyǵy aıtylady.
Mýzykant, prodıýser Baıǵalı Serkebaevtyń aıtýynsha, kitap oqýǵa jeńil jáne qarapaıym tilmen jazylǵan. «Biz de qansha shoý-bızneste júrip, eldi, jerdi aralap, ár túrli adamdarmen kezdesemiz, sondyqtan, bizdiń de aıtarymyz kóp adamdarmyz. Ókinishke oraı, onyń barlyǵyn jazýǵa ýaqytymyz bola bermeıdi. Arman qarbalas ómirine qaramastan, ýaqyt taýyp paıdaly da, «ómirdiń shyndyǵyn» kórsetken kitapty shyǵarǵany úshin óte rızamyn. Dosym úshin qýanyshtymyn jáne ol jetistigimen quttyqtaımyn»,-dedi ol.
Búginde Arman Dáýletııarov reseılik shoý bıznesti baǵyndyryp, oıyp turyp oryn alǵan, tanymal prodıýsser. Ol Murat Nasyrov, Batyrhan Shókenov, A-stýdıo toby, Dýet L, Tomas Nevergreen, taǵy basqa da kóptegen ártistermen jumys istegen. «Máskeýdegi Astana kúnderin», «Reseıdegi Qazaqstan jylyn» uıymdastyryp, ótkizýge belsene at salysty, Almaty qalasyndaǵy Azııa oıyndarynyń jabylý saltanatynda bas prodıýser boldy. 2010 jyldyń jeltoqsanynda Qazaqstan Respýblıkasy Prezıdenti Nursultan Ábishuly Nazarbaevtyń Jarlyǵymen «Qurmet» ordenimen marapattaldy.
