Almatyda áriptesteri televıdenıeniń ardageri Sholpan Baımoldınany sońǵy saparǵa shyǵaryp saldy
ALMATY. Maýsymnyń 9-y. QazAqparat /Názıra Eleýhan/ - Búgin Almatyda televızııanyń belgili maıtalman sheberi, televıdenıeniń ardageri, kóptegen habarlar men derekti fılmderdiń avtory, rejısser-ustaz Sholpan Baımoldınany sońǵy saparǵa shyǵaryp saldy,
dep habarlaıdy QazAqparat.
Qazaqstan teleradıokorporatsııasynda ótken qoshtasýǵa Sholpan Baımoldınanyń týǵan-týystary men dostary, áriptesteri men qyzmettes bolǵan joldastary jáne kóptegen shákirtteri keldi.
«Qazaq televızııasy taǵy bir eń talantty tulǵasyn qaıtpas aqtyq saparǵa attandyryp otyr. Sholpan Qaıyrtaıqyzy - qazaq telejýrnalıstıkasynyń qurylýy men damýyna úlken úles qosqan tulǵa. Ol televızııa salasyna Lenıngradtan alǵash kelgen túlekterdiń biri boldy. Qasıetti qara shańyraqqa kelgennen bastap, armandaryna qanat bitirdi. Sanaly ǵumyryn televıdenıege arnap, osy sala mamandaryn daıyndaýǵa úlken úles qosqan Sholpan Qaıyrtaıqyzynyń búkil eńbegi - televızııanyń eńbegi. Myńdaǵan mamandar ol kisini ustaz sanaıdy. Onyń barlyq eńbegi asyl aǵalardyń aq dıdaryn jazýǵa arnalǵan. Ol jasaǵan týyndylarynyń barlyǵy bizdiń altyn qorymyzda. Endi olardyń qataryna ózi kelip qosyldy», dedi Ulttyq arnanyń bas dırektory Qaınar Oljaı.
Sholpan Qaıyrtaıqyzy Baımoldına televızııa salasyndaǵy ólsheýsiz eńbegi úshin Keńes Odaǵy kezinde Qazaq Joǵary Keńesiniń Qurmet gramotasymen, «Televızııa jáne radıo úzdigi» belgisimen marapattalǵan. Elbasy Nursultan Ábishuly Nazarbaevtyń ómiri men qyzmeti týraly birneshe baǵdarlamalar men fılmderdi efırge shyǵardy. Sonymen qatar, jastarǵa arnalǵan «Qurdastar, «Rovesnıkı», «K 40-letııý Velıkoı Otechestvennoı Voıny», «Naýryz», «Altybaqan», «Suhbat», «Myń da bir rahmet», «Paı-paı jıyrma bes», «Joldas» halyqaralyq festıvali sııaqty kóptegen baǵdarlamalardy jasaǵan bolatyn.
