Almatyda áriptesin óltirgen polıtseıdiń soty bastaldy

Sot aldynda Jergilikti polıtsııa qyzmetiniń burynǵy ınspektory Azamat Beristemov jaýap berip jatyr. Oǵan QR QK 99-babynyń 1-bólimimen adam óltirdi degen aıyp taǵylyp otyr.

«Beristemov qaryndasy men kúıeýbalasynyń qatynasy durys emes ekenin bile tura, garaj terrıtorııasynda kúıeý balasymen sóılespek bolǵan. Janjal kezinde sottalýshy ony óltirýdi oılaıdy. Sodan keıin tabeldi qarýynan Sábıt Beglanulynyń sol jaq samaıynan atyp jibergen», - dedi prokýror.

Sottalýshy memlekettik aıyptaýshynyń sózin tyńdaǵan soń kúıeý balasyn óltirgisi kelmegenin aıtty.

Sondaı-aq, búgin sotta oqıǵa ornyna birinshi jetken áriptesteri Almat Janǵazın jaýap berdi.

«Ne boldy dep suradym. Kúıeý balamdy atyp tastadym dedi. Ne úshin ekenin suradym. Bilmeımin dedi. Ózi shok jaǵdaıynda boldy. Temeki shegip turdy. Al Sábıt jaqyn mańda jatty. Ol (Berıstemov) óziniń fýnktsıonaldyq mindetterin túgel oryndaǵan. Biraq onyń minezinde tákapparlyq bar bolatyn», - dedi ol.

Eske salaıyq, 2018 jyly qyrkúıek aıynyń sońyna qaraı Almatyda Jergilikti polıtsııa ınspektory Azamat Beristemov óziniń áriptesi Sábıt Beglanulyn atyp tastaǵan bolatyn. Jaraqat alǵan Sábıt Beglanuly sol kúni, túngi saǵat 22.00-de aýrýhanada kóz jumdy. Keıin tártip saqshylarynyń týysqandar ekeni anyqtaldy. Atalǵan oqıǵaǵa baılanysty QR Іshki ister mınıstri Qalmuhanbet Qasymov pikir bildirgen bolatyn.

«Kúdikti kezekshilikke kelip, qarýdy qabyldaǵan. Keıin garajdan avtokólikti alýǵa shyqqan kezde, ol kúıeý balasymen jolyqqan. Kóz jumǵan qyzmetker kezekshiligin tapsyrýǵa kelgen. Sońǵy alty aı merzimde ol otbasymen birge turmaǵan kórinedi. Keshqurym qyzmetkerler kezdesip qalǵan kezde janjal týyndap, sonyń saldarynan birinshisi qarýdan oq atqan», - dep naqtylady vedomstvo basshysy.

Ótken aptada sot otyrysy Beristemovtiń densaýlyǵyna baılanysty bolmaǵan edi.