Almatyda arhıvtanýdan olımpıada ótedi
ALMATY. QazAqparat - QR Prezıdentiniń arhıvi 8 sáýirde arhıvtanýdan olımpıada ótkizedi. Bul týraly mekemeniń baspasóz qyzmeti habarlady.
Bilim dodasy «Ult jospary bes ınstıtýtsıonaldyq reformany júzege asyrý jónindegi 100 naqty qadam» baǵdarlamasyn iske asyrý sheńberinde stýdentterdiń shyǵarmashylyq belsendiligin damytý maqsatynda ótedi.
Uıymdastyrýshylar arhıv mamandyǵyna jastardyń qyzyǵýshylyǵyn arttyrýdy kózdep otyr.
Oǵan arhıv isi boıynsha mamandanǵan, tarıh fakýltetiniń stýdentteri qatysady.
«Indýstralızatsııa jáne ekonomıkalyq ósim» ınstıtýtsıonaldyq reformasyn iske asyrýdyń mańyzdy bir bóligi - daıarlanatyn kadrlardyń básekelestik qabiletin arttyrý (79 qadam). Osy maqsatta Qazaqstan Respýblıkasy Prezıdenti Arhıvinde aýqymdy jumystar júrgizilýde.
Arhıvte turaqty túrde birqatar joǵarǵy oqý oryndarynyń tarıh fakýltetiniń stýdentterine óndiristik tájirıbe uıymdastyrylady, oqý zalynda stýdentter dıplomdyq jáne kýrstyq jumystaryn jazý úshin arhıv qujattary boıynsha zertteýler júrgizedi, arhıvtiń ár túrli is-sharalaryna qatysady, sonyń ishinde tarıhı-qujattyq kórmeler, dóńgelek ústelder, belgili zertteýshi tarıhshylarmen kezdesýler uıymdastyrylady», - delingen baspasóz habarlamasynda.
