Almatyda arheologııa jáne etnologııa máselelerine arnalǵan konferentsııa ótýde
ALMATY. 26 sáýir. QazAqparat - Búgin Almatyda IV Ábdilmanap Orazbaev oqýlary aıasynda «XIX ǵasyrdyń otandyq arheologııa men etnologııa máseleleri men jetistikteri» degen taqyryppen respýblıkalyq ǵylymı-tájirıbelik konferentsııa ótip jatyr.
Bul sharany Ál-Farabı atyndaǵy Qazaq ulttyq ýnıversıtetiniń arheologııa, etnologııa jáne murajaıtaný kafedrasy Ábdilmanap Medeýulynyń 90 jyldyǵyna oraılastyryp uıymdastyryp otyr.
Eki kúndik konferntsııa jumysy kezinde arheologııa men etnologııadaǵy teorııalyq jáne ádistemelik aspektiler, Eýrazııa qurlyǵyndaǵy tas ǵasyryn zertteý máseleleri men nátıjeleri, Ortalyq Azııa men irgeles óńirlerdi meken etken ejelgi jáne ortaǵasyrlyq kóshpendilerdiń materıaldyq jáne rýhanı mádenıeti, Qazaqstanmen irgeles aımaqtarda ornalasqan ortaǵasyrlyq qalalardyń kenttenýi, materıaldyq mádenıeti jáne basqa da taqyryptar talqyǵa túspek.
Maıdanger ǵalym, bilikti ustaz, bilgir arhelog Ábdilmanap Medeýuly Orazbaev 1922 jyly ómirge kelip, 1997 jyly ómirden ozǵan bolatyn. 1971 jyly ashylǵan burynǵy S. Kırov atyndaǵy Qazaqtyń memlekettik ýnıversıtetiniń tarıh fakýltetinde arheologııa jáne etnologııa kafedrasynyń alǵashqy meńgerýshisi boldy. Qazaqstannyń qola jáne erte temir dáýirlerin zertteý arqyly elý jylǵa jýyq ǵylymı qyzmetinde júzdegen-myńdaǵan shákirt tárbıelep, otandyq arheologııa ǵylymynyń damýyna ólsheýsiz úles qosty.
