Almatyda ardager dárigerlerge qurmet kórsetildi
ALMATY. QazAqparat – Sanjar Asfendııarov atyndaǵy Qazaq ulttyq medıtsınalyq ýnıversıtetinde medıtsına qyzmetkerleriniń kúni qarsańynda ardager mamandar qurmetke ıe boldy, dep QazAqparat tilshisi .
Sharany S.D. Asfendııarov atyndaǵy Qazaq ulttyq medıtsına ýnıversıtetiniń rektory Talǵat Nurǵojın ashty.
«Qazaqstandaǵy medıtsınalyq kadrlardy daıarlaýda Almaty erekshe ról atqarady. Kópshiligińiz osy jerde bilim alyp, tájirıbeńizdi qoldanyp, eńbek jolyn bastadyńyz. Sizder bizdiń medıtsınamyzdyń damyp jatqanyna kýá bolyp otyrsyzdar. Kásibı mereke qarsańynda sizderge, eń aldymen, zor densaýlyq jáne amandyq tilegim keledi», - dedi rektor óziniń quttyqtaý sózinde.
Óz kezeginde densaýlyq saqtaý júıesi ardagerleri keńesiniń tóraǵasy Qadyr Omarov zor eńbek sińirgen medıtsına qyzmetkerlerine Densaýlyq saqtaý mınıstrliginiń atynan marapat tabystady.
«Qazirdiń ózinde bizdiń respýblıkada on oblysta medıtsına ardagerlerine arnalǵan qoǵamdyq keńes jumys isteıdi. Aldaǵy ýaqytta ardagerlermen kóptegen is-sharalar josparlanǵan. Munyń bári bizdiń ardager dárigerler úıde otyrmaı, qoǵamdyq jumyspen aınalysýy úshin jasaldy. Sebebi olardyń bilimi men tájirıbesi - baǵa jetpes qymbat qazyna. Búgin biz elimizdiń medıtsına salasynyń damýyna orasan zor úles qosqan dárigerlerdi atap ótkimiz keledi», - dedi Qadyr Omarov.
Shara barysynda ardagerler men medıtsına ókilderi estelik aıtty.
«Biz - ulttyq medıtsınamyz endi damyp, qalyptasyp kele jatqan kezdiń kýási bolǵan adamdarmyz. Táýelsizdik jyldary kóp nárse ózgerdi. Bizdiń medıtsına óz zamanyna ilesip keledi dep maqtanyshpen aıta alamyz», - dedi Almaty qalasy densaýlyq saqtaý basqarmasy emdeý-dıagnostıka ortalyǵynyń basshysy Turarbek Tólendıev.
«Esimde, árqashan medqyzmetker bolýdy armandadym. Naqty dáriger nemese meıirbıke emes, jalpy medıtsına mamany. Meniń armanym oryndaldy. Men óz qalamdy súıemin, osynda turatyn adamdardy jaqsy kóremin. Men osy qalada týyp-óstim. Men óz jumysymda úlken tájirıbe aldym jáne kóptegen dos taptym. Áriptesterimmen jumys istegen búkil jyldarymdy erekshe baǵalaımyn. Iıa, keıbireýimiz ártúrli medıtsınalyq mekemelerde jumys istedik, biraq bárimiz bir salada el ıgiligi úshin eńbek ettik jáne ete beremiz. Bizdiń ýaqytta bul qıyn boldy. Biraq biz qıyn sátterdi bastan ótkerip, aman qaldyq», - dep bólisti Almaty qalalyq densaýlyq saqtaý basqarmasy qalalyq pallıatıvti kómek ortalyǵynyń dırektory Gúlshara Ýrmýrzına.
