Almatyda árbir úshinshi jedel járdem qyzmeti arterıaldyq gıpertonııaǵa baılanysty shaqyrylady - baspasóz máslıhaty
ALMATY. Mamyrdyń 12-si. QazAqparat /Názıra Eleýhan/ - Almatyda árbir úshinshi jedel járdem qyzmeti arterıaldyq gıpertonııaǵa baılanysty shaqyrylady jáne syrqattanýshylardyń kópshiligi aýrý belgileriniń bilinbeı ótýine baılanysty óz qan qysymynyń joǵary ekendigin bile bermeıdi.
Bul týraly búgin Almatyda Dúnıejúzilik gıpertonııamen kúres kúnine arnalǵan baspasóz máslıhatynda Kardıologııa jáne ishki aýrýlar ǵylymı-zertteý ınstıtýtynyń bas dárigeri Symbat Ábzalıeva málim etti, dep habarlaıdy QazAqparat.
Onyń aıtýynsha, kúrdeli asqynýlar - halyqtyń gıpertonııa týraly habardarlyq deńgeıiniń tómendiginde. "Tipti qarapaıym qan qysymynyń kóterilýi semizdikke, kóz kórýdiń nasharlaýyna ǵana emes, júrek ıshemııasy aýrýynyń damýyna, múgedektik pen ólimge ákeletin ınsýlttar men ınfarkterge, sondaı-aq sozylmaly búırek aýrýlaryna alyp keledi. Búgingi kúni qan qysymynyń joǵary bolýyna temeki shegýshilik, alkogoldi shamadan tys qoldaný, artyq salmaq, az qımyldaý ómir salty men kúızelister áser etýde. Sonyń saldarynan áıelderge qaraǵanda er adamdardyń kópshiligi arterıaldyq gıpertonııaǵa shaldyǵýda. Ókinishke oraı, qazirgi ýaqytta jastar da bul aýrýmen aýyrýda", dep atap ótti Symbat Ábzalıeva. Onyń aıtýynsha, Dúnıejúzilik densaýlyq saqtaý uıymynyń usynymdary boıynsha, 18 jastan asqan ár adam óz arterıaldyq qan qysymyn bilýi kerek jáne onyń norma kórsetkishi 140/90 mm synap baǵanasynan joǵary bolmaýy tıis.
Salaýatty ómir saltyn qalyptastyrý problemalary Ulttyq ortalyǵynyń bas dırektory Sáýle Dıqanbaevanyń aıtýynsha, búgingi tańda álem boıynsha arterıaldyq gıpertonııa keń taralǵan aýrýlardyń biri bolyp sanalady jáne basqa aýrýlarǵa qaraǵanda arterıaldyq gıpertonııa ólim qaýpine ákeletin aýrýlar qatarynda birinshi orynda tur. «Sońǵy kezde bul gıpertonııanyń Qazaqstanda turaqty ósýi qatty baıqalady. QR Statıstıka agenttiginiń derekteri boıynsha 2006 jyly 100 myń halyq sanyna -577,5; 2007 jyly -597,3; 2008 jyly 764,6; 2009 jyly -877,5 jaǵdaı tirkelgen», dedi Sáýle Dıqanbaeva.
Onyń aıtýynsha, Dúnıejúzilik gıpertonııamen kúres kúni aıasynda, mamyr aıynyń 17 kúni «Gedeon Rıhter» kompanııasynyń uıymdastyrýymen, elimizdiń 16 qalasynda «Óz qan qysymyńdy bil» atty keń kólemdi aktsııa bastalady. «Aktsııa barysynda barlyq turǵyndar arterıaldyq gıpertonııa boıynsha qajetti keńesterdi alyp, tegin qan qysymyn ólshete alady. Atalmysh shara medıtsınalyq uıymdarda, adamdar kóp shoǵyrlanǵan jerlerde: saýda ortalyqtarynda, áýejaılar men vokzaldarda, bıznes ortalyqtar men halyqqa qyzmet kórsetý ortalyqtarynda ótetin bolady», dedi Sáýle Dıqanbaeva.
