Almatyda Arbattyń búkil aýmaǵyna beınekamera qoıylady
E.Dosaevtyń Almaly aýdany turǵyndarymen kezdesýde keshki ýaqytta Arbat aýmaǵynan qatty shý estiletini aıtyldy.
«Abylaı han dańǵylyndaǵy 59-úıdiń turǵynymyn. Keshke Arbat jaqtan kóp shý estiledi. Sol úshin biz túrli shara qabyldaýǵa: 102-ge habarlasýǵa, patrýl shaqyrýǵa májbúrmiz. Odan bólek, munda mopedshiler de bas qosa bastady. Olar keshki jáne túngi ýaqytta jıi jınalady. Olar bizdiń eskertpelerdi tipti eleń qylmaıdy», - dedi qala turǵyny.
Erbolat Dosaev Arbat aýmaǵyna qosymsha beınekameralar ornatylatynyn aıtty.
«Biz Tsıfrlandyrý basqarmasymen birge Arbattyń búkil jaıaý júrginshiler aýmaǵyna beınekamera ornatamyz. Aýdan ákimine, Polıtsııa departamentine osy usynysty qoldaýdy tapsyramyn. Zańnamalyq retteýdiń arqasynda tártip qolǵa alynatyn bolady», - dedi Almaty ákimi.
Al qalalyq Polıtsııa departamenti bastyǵynyń birinshi orynbasary Nurlan Almasbekov Arbat boıynsha tıisti sharalar qabyldanyp, patrýlder kóbeıtiletinin málimdedi.
