Almatyda Arbattaǵy órt sóndirildi
ALMATY. QazAqparat - Almatyda Arbattaǵy órt sóndirildi. QR ІІM Tótenshe jaǵdaılar komıtetiniń resmı ókili Rýslan Imanqulovtyń aıtýynsha, búgin tańǵy saǵat 07:49-da Almaly aýdanynda, Panfılov kóshesi №99-shy mekenjaıynda ornalasqan D. Qonaev atyndaǵy Halyqaralyq Qor ǵımaratynyń shatyry órtenip jatqany týraly habar kelip túsken.
«Órt sóndirýshilerdiń alǵashqy toby oqıǵa ornyna 4 mınýttan keıin, ıaǵnı 07 saǵat 53 mınýtta kelip jetti. Eki qabatty ǵımarattyń eki qabatty temir shatyry órtti sóndirýge birshama kedergi keltirdi. Órtti sóndirý barysynda materıaldyq qundylyqtar qaýipsiz aımaqqa shyǵaryldy», - dep habarlaıdy Almaty qalalyq TJD baspasóz qyzmetinen.
Tilsiz jaý 09 saǵat 10 mınýtta aýyzdyqtalyp, 09 saǵat 27 mınýtta sóndirildi. Aldyn ala derekter boıynsha jalyn 150 sharshy metrdi sharpyǵan. Qurban bolǵandar men zardap shekkender joq.
Oqıǵa ornynda jeke quramnan 79 adam jáne 22 tehnıka jumys istedi.
