Almatyda arandatýshylyqqa jol bermeýge shaqyrdy: Qalada koronavırýs tirkelgen joq
ALMATY. QazAqparat - Almatyda vırýsty juqtyrý jaǵdaıy týraly áleýmettik jelide taralǵan vıdeo shyndyqqa janaspaıdy. Bul rolık - jalǵan, dep habarlaıdy QazAqparat Almaty ákimdiginiń baspasóz qyzmetine silteme jasap.
Taýarlar men qyzmetterdiń sapasy men qaýipsizdigin baqylaý departamenti men qalalyq Qoǵamdyq densaýlyq basqarmasy birlesip, 2020 jyldyń 30 qańtarynda Almaty qalasynda koronavırýs ınfektsııasynyń tirkelmegenin resmı málimdeıdi.
«Qalada jaǵdaı turaqty. Sizderden arandatýshylyqqa, qaýesetke senbeýge, tek bılik tarapynan beriletin resmı aqparat kózderine júginýdi suraımyz. Biz quqyq qorǵaý organdaryna arandatýshylardy anyqtaý jóninde ótinish berdik», — dedi Almaty qalasy Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaǵasımova.
Búgingi kúni Almaty qalasynda koronavırýstyq ınfektsııanyń taralýynyń aldyn alý jáne boldyrmaý boıynsha sharalar júzege asyrylýda. Bul másele qala basshysynyń jiti baqylaýynda. Sondaı-aq qala ákimniń orynbasary Erjan Babaqumarovtyń tóraǵalyǵymen Koronavırýs ınfektsııasynyń taralýynyń aldyn alý jónindegi óńirlik shtab jumys isteıdi.
Sondaı-aq, búgin Astanada ótken baspasóz máslıhatynda QR Densaýlyq saqtaý mınıstri E. Birtanov Qazaqstannyń birde-bir óńirinde, onyń ishinde iri qalalarda koronavırýs jaǵdaılary tirkelmegenin atap ótti.
Aıta keterligi, qala basshylyǵy Almatydaǵy jaǵdaıdy baqylaýda ustap otyr.
Eske sala ketsek, QR Densaýlyq saqtaý mınıstrligi atalmysh vıdeonyń jalǵan ekendigin resmı málimdep, jalǵan aqparat taratqandar QR Qylmystyq kodeksiniń 274-babyna sáıkes qylmystyq jaýapkershilikke tartylatyn jetkizdi.
