Almatyda arandatýshylar aýrýhananyń múlkin qıratty

ALMATY. QazAqparat - Almatyda basbuzarlar jedel járdem kóligine kedergi jasap, medıtsına qyzmetkerlerine zaqym keltirip, áleýmettik nysandardy qıratyp jatyr. Bul týraly Almaty qalasy Komendatýrasynyń aqparattyq ortalyǵy málim etti, dep habarlaıdy QazAqparat tilshisi.

Almaty qalasy Qoǵamdyq densaýlyq basqarmasynyń málimetinshe, agressıvti azamattar megapolıstiń emhanalary men aýrýhanalaryna kirip, medıtsınalyq mekemelerdiń múlikteri men jabdyqtaryna zııan keltirýde.

«Zańsyz áreketterdiń saldarynan jedel járdemniń 5 qyzmetkeri, onyń ishinde 2 júrgizýshi men 3 medıtsına qyzmetkeri zardap shekti. Zardap shekkender qalalyq statsıonarlarǵa jetkizildi», – delingen habarlamada.

Sonymen qatar, 2 jedel járdem kóligi joıylyp, Qalalyq kardıologııalyq ortalyqta qabyldaý bólmesi men klınıkalyq-dıagnostıkalyq bólimsheniń áınekteri synǵan.

«Almaly aýdanynyń AMSK ǵımaratynda vandalızm aktisi tirkeldi. Naýryzbaı aýdanynda №7 QKA qabyldaý bólmesine patsıentpen jedel járdem kóliginiń qatynaýy toqtatyldy. Sonymen qatar, destrýktıvti áreketterdi jaqtaýshylar jedel járdem kóligin toqtatyp, balalardy aýrýhanalarǵa jatqyzýǵa jol bermeıdi», – dep habarlady basqarmadan.

Bul áreketter patsıentterge ýaqtyly medıtsınalyq kómek kórsetýge kedergi keltiredi jáne azamattardyń densaýlyǵy men ómirine qaýip tóndiredi.