Almatyda arab sáıgúlikteriniń alǵashqy chempıonaty ótedi
ALMATY. QazAqparat - Almatyda 22-24 qyrkúıek aralyǵynda KazEqui-2017 halyqaralyq jylqy festıvali men kórmesi ótedi. Shara barysynda asyl tuqymdy arab sáıgúlikteriniń alǵashqy chempıonaty josparlanǵan.
Qazaqstanda ósirilip jatqan 20-ǵa jýyq asyl tuqymdy janýar dene turqy, qımyl-qozǵalysy standarttarǵa sáıkestik boıynsha baq synasady.
Eki kúnge sozylatyn festıval Alma-Arasan shatqalyndaǵy at sport klýbynda ótedi.
Atalǵan klýbta jylqylarǵa barynsha jaǵdaı jasalǵan.
«KazEqui-2017 - bul erekshe shoý. Ortalyq Azııadaǵy biregeı kórme. Munda asyl tuqymdy jylqy baǵatyndar ǵana emes, sarapshylar, jylqy ındýstrııasynyń óndirýshileri, osy sport túriniń ókilderi bas qosady», - dedi klýb jetekshisi Marına Býkanova.
KazEqui-2017 festıvalinde iskerlik kezdesýlerden bólek otbasylyq demalys túrleri qarastyrylǵan.
Jas ıppolog úıirmesi, ponımen serýen, otbasylyq kvestke qatysýǵa múmkindik týady.
Keshkisin jylqylardyń qatysýymen spektaklder, túrli tuqymǵa jatatyn jylqylardyń sherýi uıymdastyrylady.
Kelýshiler álemdegi eń iri Shaır tuqymdas jylqylardan bastap eń mástek jylqylarǵa deıin kóre alady.
Sonymen qatar Gınnestiń rekordtar kitabyna engen álemdegi eń kishkentaı jylqy amerıkandyq Gýllıver keledi.
«Sońǵy ýaqytta Qazaqstanda jylqy sporty erekshe qarqynmen kóterilip keledi. Halyqtyń jaǵdaıy jaqsarǵan saıyn taza tuqymdy jylqy baǵý da paıdaly ınvestıtsııa quralyna aınalýda Qazaqstanda jylqy ıesiniń mártebesi joǵary. Sondyqtan qazaqtardyń arasynda jylqyǵa qyzyǵýshylyq burynǵydaı artyp keledi», - dedi kásibı jylqy ósirýshi Igor Bochkarev.
Aıta ketý kerek, jylqy festıvaline kirý bıletiniń quny 1 kúnge 5000 teńge, 12 jasqa deıingi balalar tegin kire alady.
