Almatyda ár úıdiń kireberisine jer silkinisi kezinde evakýatsııalanatyn orynnyń kartasy ilinedi

ALMATY. QazAqparat – Almatyda barlyq úıdiń kireberisinde jer silkinisi kezinde evakýatsııalanatyn oryndarǵa qalaı jetýge bolatyny kórsetilgen karta paıda bolady. Bul týraly Erbolat Dosaev málim etti, dep habarlaıdy QazAqparat tilshisi.

Bostandyq aýdanynyń turǵyny shahar basshysynan seısmıkalyq oqý-jattyǵý kezinde almatylyqtar qaı jerge evakýatsııalanatynyn surady.

«Tótenshe jaǵdaıǵa qatysty. Bizde ár podezdiń qasynda barýǵa bolatyn jerdiń naqty shemasy ornatylady. Qalada 25 myń kireberis bar. Tótenshe jaǵdaılar departamenti usynystaryn kórsetti, aqsha bólemiz. Kúzge qaraı ár adam qaıda barý kerektigin biletin bolady. Ótken senbide men jer silikinisi kezinde jınalatyn oryndardy aralap kórdim. Onyń keıbireýleri sapasyz jaǵdaıda, olardy retke keltirý qajet. Tapsyrma berdim. Kúzde qalada úlken oqý-jattyǵý ótedi, sol ýaqytqa deıin qala daıyn bolady dep senemin. Atalǵan oryndardy kórsetemiz, adamdardy daıyndaımyz», - dep jaýap berdi ákim.