Almatyda ár alynǵan bordıýr úshin esep beriletin bolady - qala ákimi
ALMATY. QazAqparat - Almaty ákimi Baýyrjan Baıbek keńeıtilgen keńes barysynda jol jóndeýdiń jańarǵan josparyn usyndy, dep habarlaıdy QazAqparat tilshisi.
Qala basshysy turǵyndarǵa qolaıly bolý úshin jumysty barynsha sapaly ári qysqa merzimde aıaqtaýdy buıyrdy.
Qazirdiń ózinde barlyq merdigerlik uıymdar arnaıy jasalǵan qorshaýlardy aldy. Ár nysanda merdiger-kompanııa dırektorynyń, jumysqa tehnıkalyq baqylaý jasaıtyn jáne aıaqtalý merzimin qadaǵalaıtyn uıymdardyń baılanystary kórsetilgen pasport ornatylady.
Qalalyq Jolaýshylar kóligi jáne avtomobıl joldary basqarmasynyń basshysy Maqsut Isahov ár kóshe boıynsha aqaý aktisi jasalǵanyn aıtty.
Soǵan sáıkes ár kóshedegi buzylmaǵan bordıýrler Naýryzbaı jáne Alataý aýdanyna jiberiledi.
«Bıyl jóndeletin ár kóshe boıynsha biz aqaý aktisin jasadyq. Alynǵan bordıýrler qaıta qoldanysqa ketedi. Olar jóndeý qarastyrylmaǵan kóshelerge trotýar, pandýs retinde jaratylady. Barlyq tıisti aqparat ákimdiktiń «Open Almaty» qoǵamdyq qabyldaýynyń portalynda jarııalanady» - dedi ol.
Baıbektiń tapsyrmasymen aýdandyq ákimdikter trotýarlardy tekserdi. Bolashaqta júrginshilerdiń qozǵalysyna kedergi keltirip otyrǵan jabaıy saýda oryndary túgel alynady.
Aıta ketý kerek, Almatyda 2018 jyly uzyndyǵy 155 shaqyrym bolatyn 157 kóshe jóndeledi. Maqataev, Baıtursynov jáne Jarokov kóshelerindegi tramvaı joldaryn alyp tastaý qarastyrylǵan. Jol jıegindegi trotýarlar abattandyrylyp, aryqtar jańarady.
