Almatyda aptanyń qaı kúnderi jol apaty jıi bolady
Almatyda jyl basynan beri 470 myńnan astam jeńil avtokólik tirkelgen, onyń ishinde 250 myńynyń paıdalaný merzimi 10 jyldan asqan.
Polıtsııa departamentiniń málimetinshe, Almatyǵa kún saıyn 200 myńǵa jýyq avtokólik kiredi. Onyń ishinde shamamen 160 myń kóliktiń paıdalaný merzimi 10 jyldan asqan. Bul qalanyń ekologııalyq ahýalyna jáne jol qozǵalysy qaýipsizdigine aıtarlyqtaı áser etedi.
2019 jyly Almatyda jol-kólik oqıǵalary jıi oryn alǵan 20 jol ýchaskesi anyqtaldy.
QR Bas prokýratýrasy quqyqtyq statıstıka jáne arnaıy esepke alý jónindegi komıtetiniń málimetinshe, 2019 jyly Almatyda 4 489 kólik apaty bolǵan. Onda 161 adam qaza taýyp, 5 308 adam túrli dene jaraqatyn alǵan.
Kólik apatynan qaza tapqandardyń basym bóligi - 21-29 jasta. Kóz jumǵandar men zardap shekkenderdiń 50%-dan astamy - 18-39 jastaǵy jastar.
Jol-kólik oqıǵalarynyń kóbi – 47,5% rettelmeıtin kóshe qıylystarynda bolady.
Barlyq tirkelgen zańbuzýshylyqtardyń úshten biri – jyldamdyqty attyrý (1605). Apattardyń úshten bir bóligi manevr jasaý erejesin buzý saldarynan bolǵan, 12%-dan astamy – jaıaý júrginshi ótkelinen ótý erejesin buzý (555).
Júrgizilgen tekserý nátıjıesi boıynsha, Almatyda jol-kólik oqıǵalarynyń basym bóligi kúndiz bolady – 65,7% (2884) jáne sáýir, mamyr, maýsym, qyrkúıek aılarynda jasalady. Osy tórt aıdaǵy JKO úlesi bir aıda orta eseppen 9,5- 9,9% nemese jalpy 38,8%-dy qurady.
Apta kúnderi boıynsha apattyń eń kóbi dúısenbi, sársenbi jáne jumaǵa keledi – 15%-ten, al eń azy jeksenbide – 12,7%. Bul jumys kúnderi qalyptasqan qozǵalys jaǵdaıynyń demalys kúnderi ózgeretinin kórsetedi.
JKO sanyn azaıtý úshin «VisionZeroAlmaty» is-qımyl jospary aıasynda retteletin jaıaý júrginshi ótkelderi, baǵdarsham, shyǵyńqy aıaldamalar, jaıaý júrginshi ótkelderine LED-jaryqtandyrý ornatyldy. Bıyl baǵdarsham ornatý, kóshelerdi ortasha jóndeý, qaýipti jol ýchaskelerinde qaýipsizdik aımaqtaryn salý, rettelmeıtin jaıaý júrginshi ótkelderin jaryqtandyrý jumystary jalǵasýda.
30 baǵdarsham men 70 retteletin jaıaý júrginshi ótkelin salýǵa jobalaý-smetalyq qujattama ázirlenýde, sondaı-aq rettelmeıtin 70 jaıaý júrginshi ótkeline LED-jaryqtandyrý ornatylyp, trapetsııa tárizdes jasandy kedir-budyr jasalady. Jol qorshaýyn ornatý jumystary jalǵasady.
Jalpy, Almatyda jol qozǵalysy salasynda álemdik standarttar men normatıvterdi engizý jumysy júrip jatyr. Jol jóndeý, rekonstrýktsııalaý, jolaıryq salý, tuıyq kóshelerdi uzartý isi qolǵa alynyp, jerústi ótkelderi salynýda. Jol qozǵalysynyń tańbalaý, shekteý jáne retteý júıeleri jaqsaryp keledi. Qoǵamdyq kólik úshin bólingen jolaqtar salyndy. Kósheler men joldardy jaryqtandyrý jańǵyrtylyp, jańalary iske qosylýda. Qoǵamdyq kólik, velosıped qozǵalysy damyp otyr.
«Jol qozǵalysynyń qaýipsizdigi» AAJ kómegimen 2020 jyldyń 3 aıynda 63,4 myń ereje buzý faktisi tirkeldi, 299,9 mln teńge aıyppul salyndy. Osy kezeńde «Sergek» tirkegen zańbuzýshylyq sany 37 myńǵa jýyqtap, 156 mln teńge aıyppul salyndy.