Almatyda apatty úıde turǵan 140 otbasy jańa baspanaǵa kóshti
ALMATY. QazAqparat - Búginge deıin apatty dep tanylǵan baspanadan 140 almatylyq otbasy jańa páterge kóshti, dep habarlaıdy QazAqparat tilshisi.
Almaty «Áleýmettik-kásipkerlik korporatsııasy» AQ málimetinshe, 2019 jyldyń basynan beri turǵyn úı qoryn qaıta jańartý baǵdarlamasy aıasynda 140 otbasy jańa baspanaǵa ıe boldy.
«140 otbasy jańa páterge ıe boldy, onyń 30-y tozyǵy jetken úıleriniń ornyna jańa turǵyn úı keshenderiniń qurylysy aıaqtalǵansha ýaqytsha baspanany tańdady», - dep túsindirdi vedomstvodan.
Búgingi tańda Almaty qalasynda 1930-1975 jyldar aralyǵynda salynǵan eki qabatty 1427 eski úı bar. Olardyń kópshiligi Túrksib aýdanynda (607 úı) ornalasqan. Eski úılerdiń negizgi mańyzdy problemalary: seısmıkalyq jáne órt qaýiptiligi, sondaı-aq ınjenerlik kommýnıkatsııalardyń bolmaýy.
Buǵan deıin Almatyda apatty úıler turǵyndardyń 100% kelisimimen buzylatyny týraly jazǵan bolatynbyz.
