Almatyda apaly-sińlili qyzdar 25 jyl qujatsyz ómir súrgen
ALMATY. QazAqparat – Almatyda apaly-sińlili qyzdar 25 jyl boıy qujatsyz ómir súrgen. Bul týraly QazAqparat tilshisi Polıtsııa departamentine silteme jasap habarlaıdy.
Áıelderdiń Qazaqstan azamaty ekendigin rastaıtyn qujaty bolmaǵan.
«Bir aı buryn Bostandyq aýdany polıtsııa basqarmasynyń kóshi qon qyzmetine áıelderdiń týystary qujat rásimdeýge kómek surap júgingen. Qyzdar ata-anasy Koreıaǵa ketken soń uzaq jyldar boıy ájesimen turǵan. Olardyń qolynda týý týraly kýáliginen basqa jeke basyn kýálandyratyn basqa eshqandaı qujat bolmaǵan. 16 jasqa tolǵan soń otbasylyq problemalarǵa baılanysty ári turǵylyqty mekenjaıy bolmaǵan soń qyzdar qujat rásimdemegen. Olar turmysqa shyǵyp, balaly bolǵan soń da eshqandaı járdemaqy, jórgekpul ala almaǵan. Ári balalaryna týý týraly kýálik rásimdeı almaǵan. Qyzdardyń qujattaryn qaraı kele Qazaqstan Respýblıkasynyń Azamattyǵy týraly zańynyń 3-babymen olardyń sol eldiń azamaty ekenin rastaıtyn qujat rásimdeý týraly sheshim shyǵaryldy», - dedi PD Kóshi-qon basqarmasynyń basshysy Ashat Býtýnchınov.
Polıtsııa qyzmetkerleri jaqynda ápkeli-sińlilerge qujattaryn tapsyrdy.
