Almatyda antıterrorlyq oqý-jattyǵý ótedi

ALMATY. QazAqparat - 22 maýsym kúni Almatynyń Almaly aýdany Klochkov kóshesinde tańǵy saǵat 10:00-den túski saǵat 13:00-ge deıin josparlanǵan antıterrorlyq oqý-jattyǵý ótkiziledi, dep habarlaıdy QazAqparat tilshisi.

Oqý-jattyǵýdyń basty maqsaty – adam kóp jınalǵan jerde terrorlyq qaýip tóngen jaǵdaıda ózara is-áreket daǵdysyn jetildirý.

Oqý mindetteri terrorıstik kózqarasqa osal nysandardaǵy terrorızm aktisiniń jolyn kesý mehanızmin damytýǵa baǵyttalǵan.

Habarlanǵandaı, oqý-jattyǵý kezinde júris-turysty shekteý sharalary qarastyrylady.

Sol sebepti qalanyń terrorızmge qarsy jedel shtaby turǵyndardan atqarylyp jatqan amaldarǵa túsinistikpen qarap, qaýipsizdik erejelerin saqtap, jattyǵýǵa qatysatyn memlekettik organ qyzmetkerleriniń zańdy talaptaryn oryndaýdy suraıdy.

Sondaı-aq, QR ÁQbK 443 babyna sáıkes, qoǵamdyq tártipti qamtamasyz etýge qatysatyn adamnyń zańdy talabyna baǵynbaý ákimshilik jaýapkershilikke ákep soqtyratynyn eskerý qajet.