Almatyda "Ańshylyq hıkaıalary" degen kitap jaryq kórdi

Avtory aqyn, jazýshy, Shyńjań Jazýshylar odaǵynyń múshesi Nurıla Qyzyhanqyzy. Bul qalamgerdiń Qazaqstanda basyp shyǵarylǵan ekinshi kitaby bolyp otyr. Alǵashqysy 2005 jyly "Ertistiń arǵy jaǵynan" degen atpen shyqqan edi.

"Bul kitapta qazaq ańshylyǵynyń qyr-syry aıtylady. Oǵan bolǵan naqty oqıǵalar boıynsha jazylǵan 63 etnografııalyq áńgime, esseler enip otyr. Men ózim aqynmyn, Qytaıda "Soltústik úıek jarqyly", "Aýyl áýenderi" sııaqty birneshe óleń kitabym shyqqan. Ákem Qyzyhan Aqymanuly qasqyr, túlkini aıtpaǵanda bir ózi 23 aıý ustaǵan Qytaıdaǵy áıgili ańshy. Almatyda bolǵan kezimde Aqedil Toıshan degen azamat «ákeńiz úlken ańshy eken, ańshylyqtan ne bilesiz. Siz osyny jazsańyz. Bul qazaqtyń óneri, sharýashylyǵy, tarıhy basqa adam ony siz sııaqty jetkizip aıta almaıdy. Ózińiz jazǵanyńyz oryndy», degendi aıtty. Sonyń nátıjesinde ózimniń bilgenderimnen Almatyda 1-2 aıdyń ishinde bastapqy 20 shaqty áńgimeni jazyp shyqtym. Ol qıyn bolǵan joq. Keıin Qytaıǵa qaıqan kezde ákemmen jáne ózge de ańshylarmen áńgimelesip onyń sanyn 70-ke deıin jetkizdim", deıdi Nurıla Qyzyhanqyzy. Onyń aıtýynsha, "Qazaqtyń ańshylyq qural-saımandary men ádis amaldary" degen maqalasy "Mura" jýrnalynyń usynýymen Qytaı Halyq Respýblıkasynyń "Tulpar" syılyǵyn alǵan. Shyńjań Jazýshylar odaǵynyń usynysymen tóte jazýmen 2009 jyly Shyńjań halyq baspasynda "Ańshylyq hıkaıalary" jeke kitap bop shyǵady. Oǵan deıin kitaptyń bir bólimi Qaısha Tábáriktiń aýdarmasymen qytaı tilinde Shanhaıda shyǵatyn "Tıana" degen jýrnalǵa basylady. Oqyrmandardyń erekshe qyzyǵýshylyǵyn týdyrǵan "Ańshylyq hıkaıalary" endi jeltoqsannyń alǵashqy jartysynda Shyńjań jastar baspasynan hanzý tilinde shyqpaq.