Almatyda ánshi Erjan Nurǵalıevtiń shyǵarmashylyq keshi ótti
ALMATY. 8 jeltoqsan. QazAqparat /Názıra Eleýhan/ - Keshe Almatyda «Metro» túngi klýbynda tanymal ánshi Erjan Nurǵalıevtiń «Meniń ómir jolym» atty shyǵarmashylyq keshi bolyp ótti.
Keshte ánshiniń «Meniń súıikti ánderim» atty tuńǵysh albomynyń tusaýy kesildi.
Albom eki dıskiden turady. «Tek Sizder úshin...» dep atalatyn birinshi taspaǵa qazaq, aǵylshyn, ıtalıan, aǵy da basqa tilderdegi 20 kompozıtsııa, al, ekinshi «Qaraqshy» dep atalatyn taspaǵa kompozıtor Nurtaı Erkeǵulovtyń mýzykalaryna jazylǵan ánder kirgen.
«Eki dıskige de kóp jyldan beri aıtyp kele jatqan súıikti ánderim kirdi. Men óz ómir jolymdy tyńdarmandarǵa ánderimmen jetkizgim keldi. Sońǵy eki jylda dostaryma 2000 dana ánderimniń kóshirmesin jazyp berippin, sodan keıin nege albomymdy shyǵarmasqa degen oı kelip, mine tuńǵysh án jınaǵymdy jaryqqa shyǵaryp otyrmyn»,- dedi Erjan Nurǵalıev.
Kesh barysynda ánshi armanymen de bólisti. «Súıikti ánshim bolyp tabylatyn Andrea Bochellımen birge án salǵym keledi», deıdi ol.
Kompozıtor Nurtaı Erkeǵulovtyń aıtýynsha, Erjan Nurǵalıev talant ıesi. «Onyń boıynda tabıǵat bergen daryn bar. Dara vokaldy qabileti bar, Erjannyń bolashaǵy zor dep bilemin. Búginde onyń shyǵarmashylyǵyn jaqyn jáne alys sheteldikter jaqsy biledi», -dedi ol.
Erjan Nurǵalıev - tenor daýysty ánshi, tanymal klassıkalyq ánderdiń, álemdik hıt ánderdiń qazaqstandyq jalǵyz oryndaýshysy. Ol QR Halyq ártisteri Nádııa Sháripova men Ermek Serkebaevtyń shákirti bolyp tabylady. Ol ıtalıan ánderi festıvaliniń laýreaty. Ony qazaqstandyq mýzykanttar álemge tanymal ánshiler Andrea Bochellı men Nıkolaı Baskovqa teńeıdi».
