Almatyda «Anna Karenına» tragedııasynyń tusaýkeseri ótti
ALMATY. QazAqparat - Almatyda Muhtar Áýezov atyndaǵy Qazaq memlekettik drama teatrynda "Anna Karenına" tragedııasynyń tusaýkeseri ótti, dep habarlaıdy QazAqparat tilshisi.
Qoıylymǵa orys jazýshysy Lev Tolstoıdyń "Anna Karenına" shyǵarmasy arqaý bolǵan. Týyndyny qazaq tiline aýdarǵan Qazaqstannyń eńbek sińirgen qaıratkeri Ashat Maemırov, rejısseri Qazaqstannyń halyq ártisi, professor - Esmuhan Obaev. Rejısser álemge tanymal týyndynyń bul sahnalyq nusqasy áıeldiń tylsym janyna ǵana emes, jubaılar jumbaǵy, ana men bala, dostyq pen satqyndyq, mahabbat pen óshpendilik syndy uǵymdarǵa tereń boılaýǵa múmkindik beredi deıdi.
Qoıylymda Anna Karenınanyń janaıqaıy, ózimen ózi arpalysqa túsken, ótken ómiri de, bolashaǵy da bulyńǵyr áıel taǵdyry beınelenedi. Qoıylymnyń negizgi jetkizer oıy da osy. Akterler kórermendermen tyǵyz baılanysa otyryp, atalǵan týyndyny barynsha shynaıy jetkize bildi.
Esterińizge sala ketsek, Anna Karenına rólin QR "Daryn" memlekettik jastar syılyǵynyń laýreaty Nazgúl Qarabalına, Alekseı Karenın rólin QR eńbek sińirgen qaıratkeri Baýyrjan Qaptaǵaı, Alekseı Vronskıı rólin N.Qýanyshbaıuly óz deńgeıinde somdap shyqty. Qoıylymnyń sońynda kórermen ystyq yqylasyn úzdiksiz qol shapalaqpen bildirdi.
Aıta keteıik, qoıylym tusaýkeseri 24 jáne 25 qarasha kúnderi de jalǵasady.
