Almatyda Amerıkanyń arnaýly agentteri esirtki barony Eskobardy tutqyndaý qupııasymen bólisedi

ASTANA. QazAqparat - Pablo Eskobardy tutqyndaý operatsııasyna qatysqan Esirtkige qarsy kúres basqarmasynyń zeınetke shyqqan jetekshi agentteri Haver Penıa men Stıven Merfı 9-11 naýryz aralyǵynda Almaty qalasyna keledi. Bul týraly Qazaqstandaǵy AQSh Dıplomatııalyq ýákildigi habarlaıdy.

Beısenbi, naýryzdyń 10 kúni, saǵat 19:00-da Penıa jáne Merfı KIMEP ýnıversıtetiniń Great Hall zalynda kópshilikpen kezdesedi.Olar Kolýmbııa jáne AQSh-tyń quqyq qorǵaý organdarynyń yntymaqtastyǵy jáne birlesip jumys isteý nátıjesinde 1993 jyly «kokaın patshasy» atalǵan - álemdegi eń baı esirtki satýshy Eskobardy tutqyndaý barysyn áńgimeleıdi. Lektsııaǵa kirý tegin, orys tilinde ilespe aýdarma usynylady. Sonymen qatar, sapar barysynda, Merfı jáne Penıa Іshki ister mınıstrligi akademııasynyń jáne Ulttyq qaýipsizdik komıtetiniń Shekara qyzmeti akademııasynyń stýdentteri jáne oqytýshylarymen kezdesedi. Olar Bishkekke naýryzdyń 14-15 kúnderi barady.

Pablo Eskobardy tutqyndaýdaǵy róli úshin Penıa jáne Merfı AQSh pen Kolýmbııa úkimetteri atynan eń joǵary marapattarǵa ıe bolǵan. Olardyń mansaptaryna osy operatsııa aıtarlyqtaı áser etip, onyń nátıjesinde kóptegen syılyqqa ıe boldy. Netflix kompanııasy túsirgen «Narko» telehıkaıasyndaǵy agentterdi somdaǵan akterler Haver Penıa men Stıv Merfıdi beıneleıdi. Penıa jáne Merfı telehıkaıa túsirý kezinde oǵan sarapshy retinde keńes berdi.
Ataqty agentterdiń Qazaqstan men Qyrǵyzstanǵa sapary Almatydaǵy AQSh Esirtkige qarsy kúres basqarmasynyń óńirlik bıýrosy men ortalyqazııalyq quqyq qorǵaý organdary arasyndaǵy halyqaralyq esirtki saýdasyna qarsy kúres boıynsha yntymaqtastyqtyń mańyzdylyǵyn kórsetedi.