Almatyda amerıkandyq dáriger Robert Bakendorf aýtızm syrqatyna qatysty tegin semınar ótkizdi
ALMATY. 11 qazan. QazAqparat /Názıra Eleýhan/ - Almatyda aýtızm syrqatyna baılanysty erekshe semınar ótip jatyr. Ony AQSh-nan kelgen dáriger, ǵylym doktory, logoped mamany Robert Bakendorf «Almaty» qonaqúıiniń konferents-zalynda tegin ótkizýde.
«Men osy syndy kóshpeli semınarlardy ata-analar úshin ǵana emes, tárbıeshilerge de, keńesshiler men dárigerlerge óz qarajatyma tegin ótkizip turamyn. Ondaǵy maqsatym - óz bilgenimmen bólisý, kómeke muqtaj jandarǵa qol ushyn berý bolyp tabylady»,-dedi R.Bakendorf.
Aýtızm aýrýyn tıimdi emdeýdi zerttegen Robert Bakendorf dárigerdiń semınary keshe bastalǵan. Qazir semınar jumysyna - Daýn syrqatyna shaldyqqan balalardyń ata-analary men tárbıeshileri, dárigerler men keńesshiler qatysýda.
Semınar barysynda syrqatty emdeý, dıagnozdy qoıý, aýtızmge shaldyqqan balalarmen otbasyndaǵy jumys, oladyń tili men sóıleýin damytý, aınalasyndaǵy adamdarmen qarym-qatynas, tildik jattyǵýlardyń túrleri, ondaı balalardyń erekshelikteri jáne budan ózge de aýtızm syrqatyna baılanysty taqyryptar sóz bolýda.
Amerıkandyq dáriger semınarmen qatar, búgin aýtızmmen aýyratyn balalardy jeke qabyldady.
Dárigerdiń aıtýynsha, ol Astanada da osy syndy eki kúndik semınar ótkizetin bolady. Astanadaǵy semınardyń jumysy erteń bastalady.
«Semınardy ótkizý ıdeıasy, meniń dosymnyń balasynyń Daýn sındromymen dúnıege kelgennen paıda boldy. Ákesi de, týǵan-týystary, biz de ár túrli aqparat kózderi arqyly emdelýdiń tásilderin, sonymen qatar, jaqsy dárigerdi izdeı bastadyq. Osylaısha, aýtızm salasynyń mamany Bakendorf dárigerge shyqtyq. Ol birden kelisimin berdi. Jalpy, aýtızm búginde - az zerttelgen aýrýdyń túri. Ókinishke oraı, elimizde ondaı balalarmen jumys isteý ádisi damymaǵan. Sondyqtan, bul tegin ótkizilgen semınar mundaı balalardyń ata-analary úshin úlken syılyq boldy dep oılaımyn»,-dedi dárigerdi shaqyrǵan jerlesimiz Mádı Áýbakırov.
