Almatyda «AMANAT» partııasynyń qalalyq fılıalyna jańa tóraǵa saılandy
Fılıaldyń baspasóz qyzmetinen habarlaǵandaı, búgin Almatyda partııanyń qalalyq fılıalynyń kezekten tys XXXI konferentsııasy ótti.
Іs-sharaǵa «AMANAT» partııasynyń Hatshysy Dáýlet Káribek, qalalyq fılıal Saıası keńesiniń jáne qoǵamdyq keńesterdiń músheleri, bastaýysh partııa uıymdary men «Jastar Rýhy» jastar qanatynyń ókilderi qatysty.
Konferentsııa delegattary ashyq daýys berý arqyly partııa fılıalynyń tóraǵasy qyzmetine Meıirjan Otynshıevti saılady. Ol óz sózinde «AMANAT»-tyń saılaýaldy ýádeleri men partııalyq jobalardyń júzege asyrylýyna toqtaldy.
«Qaı partııanyń múshesi ekendigine qaramastan, jalpy Almaty turǵyndarymen turaqty baılanysta bolý arqyly biz osy ýaqyt ishinde olardyń qajettilikteri men talap-tilekterinen habardar bolyp otyrdyq. Bul óz kezeginde bizge turǵyndardyń bastamalary men keń aýqymdy máseleler boıynsha usynystaryna der kezinde jaýap berýge múmkindik berdi. Máselen, eki jyl ishinde partııanyń Almaty qalasyndaǵy fılıaldaryna 16 myńnan astam adam júgindi. Ótinishterdiń 61%-y oń sheshimin tapsa, 38%-y boıynsha quzyretti túsiniktemeler berildi, al qalǵan bóligi qaralý ústinde», - dedi Meıirjan Otynshıev.
Ol partııanyń saılaýaldy baǵdarlamasyn júzege asyrý aıasynda eki jyl ishinde 486,5 shaqyrym avtojol qaıta jańartylyp, jóndelgenin, halyqtyń sýmen jabdyqtaý qyzmetterine qol jetkizý deńgeıi 99%-ǵa deıin jetkenin, 390 shaqyrymnan astam elektr jelilerine qaıta jańartý júrgizilgenin, shamamen 3,3 mln sharshy metr turǵyn úı paıdalanýǵa berilgenin atap ótti. Sondaı-aq, 24 mektep pen 19 mektepke qosymsha ǵımarat salynyp, 182 mektepke deıingi mekeme ashylǵan. Úsh medıtsınalyq nysandy jóndeý aıaqtaldy, 7 sport nysany paıdalanýǵa berildi.
Aıta keteıik, qazirgi ýaqytta Almatyda partııa qatarynda 52 myńǵa jýyq adam bar, 274 bastaýysh partııa uıymy jumys isteıdi.
