Almatyda altynshy tegin muz aıdyny ashyldy
ASTANA. QazAqparat - Almatyda Bostandyq aýdanynda ornalasqan VILLA Boutiques & Restaurants aldynda jappaı syrǵanaýǵa arnalǵan altynshy tegin muz aıdyny ashyldy, dep habarlaıdy QazAqparat aqparattyq jáne sporttyq HAB-qa silteme jasap.
Bul syrǵanaq almatylyqtar men qala qonaqtary úshin eki tehnıkalyq úzilispen (muzǵa baılanysty) táýlik boıy tegin jumys isteıdi. Bul osyǵan deıin salynǵan muz aıdyndarynyń ishindegi eń shaǵyny bolyp sanalady. Sonymen qatar, alańda konkıdi jalǵa berý jáne tamaqtaný oryny qarastyrylǵan. Olar demalys kúnderi 11:00-den 23:00-ge deıin, al jumys kúnderi 12:00-den 22:00-ge deıin jumys isteıdi. Konkıdi 1 saǵatqa jalǵa alý 600 teńge bolsa, 1 seansqa (3 saǵat) 1 500 teńge. Kelýshiler óz konkıimen tegin syrǵanaýǵa da bolady.
«Búgin biz balalarymyzben keldik. Ózimiz jaqyn jerde turamyz. Tegin syrǵanaý alańy ashylyp jatqany árıne bizdi qýantady. Ol elimizdegi sportty damytýǵa óz septigin tıgizedi degen oıdamyn. Endi jıi kelip turýǵa tyrysamyz. Uıymdastyrýshylarǵa alǵys bildiremiz», - dedi Almaz Údemtashıev esimdi ata-ana.
Muz aıdynnyń ashylý rásiminde kóptegen balalar men ata-analar qatysyp, olardyń kóńilin mýltserıaldardaǵy batyrlar men anımatorlar aýlady.
«Maǵan bul jer qatty unady. Basqa muz aıdyndarynda da jıi bolamyn. Konkıdi jaqsy teýip úırengim keledi. Bul jerdiń atmosferasy qyzyqty bolyp tur, anımatorlarda jaqsy eken», - dep kelýshilerdiń biri Salıma Aqylbek. 
Esterińizge sala ketsek, jeltoqsannyń birinen bastap osyndaı tegin muz aıdyndary Jibek joly - Abylaı han kóshesinde, Qazaqstannyń Tuńǵysh Prezıdenti saıabaǵynyń aldynda, «Mart» saýda ortalyǵy manyńda, Spartak stadıonynda jáne Dýbok yqsham aýdanynda ashylǵan bolatyn. Jaqyn arada tegin muz alańdary Alataý jáne Naýryzbaı aýdandarynda iske qosylady. 
Atalǵan muz aıdyndar tek jappaı syrǵanaýǵa arnalǵan. Olar qys mezgiliniń sońyna deıin jumys isteıdi. Jobanyń Almaty qalasynyń ákimdigi uıymdastyrady.
