Almatyda Altynsarın kóshesinde avtobýs jolaǵy paıda boldy
ALMATY. QazAqparat - Almatyda Altynsarın kóshesinde avtobýs jolaǵy paıda boldy. Endi joldyń oń jaq shetimen tek qoǵamdyq kólik jáne ońǵa burylatyn kólikter ǵana júre alady, dep habarlaıdy QazAqparat tilshisi.
Qalalyq Jolaýshylar tasymaly kóligi men avtomobıl joldary basqarmasynyń basshysy Maqsut Isahovtyń aıtýynsha, bıyl taǵy eki kóshede avtobýs jolaǵy salynady.
«Tamyz aıynyń sońyna deıin Ótegen batyr men Qabdolov kóshelerinde avtobýs jolaqtary salynady. Osylaısha bul kósheler avtobýs jolaqtary bar Tóle bı, Abaı, Raıymbek kóshelerin ózara baılanystyratyn bolady», - dedi basqarma basshysy.
Buryn Almatydaǵy avtobýs jolaǵynyń jalpy uzyndyǵy 85 shaqyrym bolsa, bıyl 93 shaqyrymǵa jetip, 7,1 shaqyrymǵa uzarmaq.
Sondaı-aq, qala bıligi Almatydaǵy keptelisti azaıtý maqsatynda eki kóshedegi qozǵalysty bir baǵyttyq etpek.
Qyrkúıekten bastap Shevchenko men Qurmanǵazy kóshelerinde jol baǵyty birjaqty bolady.
Shevchenko kóshesiniń boıynda Dostyq dańǵylynan Jarokov kóshesine deıingi aýmaqta tramvaı relsteri alynyp tastalǵan soń, joldar ortasha aǵymdaǵy jóndeýden ótedi jáne batys baǵytqa qaraı kólikter qozǵalysy birjaqty bolady. Qurmanǵazy kóshesi boıynda Muqanov kóshesinen Dostyq dańǵylyna deıingi ýchaskede jóndeý jumystary aıaqtalǵan soń, shyǵys baǵytta birjaqty kólik qozǵalysy jasalady.
