Almatyda Altynbek Qorazbaevtyń án keshi ótedi
ASTANA. 23 sáýir. QazAqparat - Almatydaǵy Respýblıka saraıynda 27 sáýir kúni Qazaqstannyń halyq artısi, Memlekettik syılyqtyń laýreaty, «Parasat» ordeniniń ıegeri Altynbek Qorazbaevtyń «Án-jyrym saǵan, týǵan jer» dýmandy án keshi ótedi,
dep jazady «Aıqyn gazeti.
«Dál osy kontsert el Táýelsizdiginiń 20 jyldyǵyna oraı Astana qalasynda ótken bolatyn. Sol baǵdarlamany elimizdiń Ońtústik astanasynda qaıtalaý qajettigi týyp, kúrdeli jóndeýden keıin endi ǵana tutynýǵa berilgen Respýblıka saraıynda berýdi jón sanadyq. Qazirgi tańda osy úlken sharaǵa qyzý daıyndyq ústindemiz. Bul keshtiń bir ereksheligi retinde kontsertke Qurmanǵazy atyndaǵy ult aspaptar orkestriniń qatysýyn atap óter edim. Óıtkeni ózim osy orkestrde 42 jyl buryn dombyrashy bolyp qyzmet etkenmin. Mine, osy úlken ujymmen birigip, Baǵdat Sámedınova «Saǵyndym Kenen atamdy» ánin oryndaıdy. Ándi orkestrge óńdep túsirgen meniń ustazym Nurǵısa Tilendıev bolatyn. Bul týyndy kúıshiniń qoltańbasy qalǵan úlken mura qatarynda tur. Keshte, sonymen birge qulyn taıdaı tel ósken dosym - Qarshyǵa Ahmedııarovqa arnaǵan «Qarshyǵa tolǵaý» degen kúıim oryndalady. Bul týyndy orkestrdiń oryndaýymen halyqqa tuńǵysh ret jol tartpaqshy. Budan basqa da kóptegen ánder orkestrdiń súıemeldeýimen shyrqalatyn bolady»,- deıdi Altynbek Qorazbaev.
