Almatyda «Altyn saqa» balalar spektaklderiniń festıvali ashyldy (FOTO)
ALMATY. QazAqparat - Búgin Almatyda Ǵ. Músirepov atyndaǵy Qazaq memlekettik akademııalyq balalar men jasóspirimder teatrynda tuńǵysh ret uıymdastyrylyp otyrǵan «Altyn saqa» atty balalar spektaklderi festıvaliniń ashylýyna oraı, baspasóz máslıhaty ótkizildi. Onda teatr basshylyǵy atalmysh is-sharanyń qyr-syryna toqtaldy.
«Bul - el teatry tarıhynda balalarǵa arnalǵan tuńǵysh festıval. Bul ishki festıval bolǵandyqtan, kórermen nazaryna bizdiń teatrda qoıylyp júrgen spektaklder kórsetiledi. Festıvaldi uıymdastyrýdaǵy basty maqsat - akterlardyń sheberligin shyńdaý jáne ertegilerge negizdelgen teatr qoıylymdary arqyly jas kórermenderdi ulttyq rýhta patrıottyq tárbıe berýge kúsh salý», - dedi óz sózinde Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń dırektory Sábıt Ábdiqalyqov.
Sonymen qatar, ol festıval aıasynda ár túrli atalymdar boıynsha júldeler taǵaıyndalǵandyǵyn jetkizdi.
«Jospar boıynsha festıvaldi respýblıkalyq deńgeıde uıymdastyrý kózdelgen edi. Biraq, qarjy daǵdarysyna baılanysty ol júzege aspady. Biraq, biz «aqsha joq» dep qarap otyrmaı, ishki qarjymyzdan júldeler taǵaıyndadyq. Jalpy, júlde qory - 700 myń teńgeni qurady. Ár atalymǵa 50-100 myń teńge kóleminde aqshalaı syıaqylar qarastyryldy. Bolashaqta budan da kólemdi bolady degen úmittemiz», - dedi S. Ábdihalyqov.
Bul festıvalde Baıdildá Qaltaev atyndaǵy «Eń úzdik er adam beınesi úshin», Aqqaǵaz Mámbetova atyndaǵy «Eń úzdik áıel beınesi úshin», Qasym Jákibaev atyndaǵy «Eń úzdik qosalqy róldegi er adam beınesi úshin», Ámıná Ómirzaqova atyndaǵy «Eń úzdik qosalqy róldegi áıel beınesi úshin», «Eń úzdik epızodtyq ról», «Epızodtyq róldegi akterlyq sheberligi úshin», «Kórermender kózaıymy», «Eń úzdik debıýt» atalymdary qarastyrylǵan. Marapattaý rásimi 27 naýryzda, ıaǵnı Halyqaralyq teatr kúni ótkiziledi.
Aıta ketelik, festıval aıasynda 24 naýryz kúni saǵat 11:00-de - «Naýryz dýman», saǵat 13:30-da - «Er kójek», 15:30-da - «Altyn múıizdi kıik», 25 naýryz kúni saǵat 11:00-de - «Tompaqpen kelgen Jańa jyl», saǵat 14:00-de - «Maýglı» jáne 26 naýryz kúni saǵat 11:00-de - «Batyl kójekter», saǵat 14:00-de «Aldar kóse» spektakldderin kórsetý josparlanǵan.
