Almatyda «Altyn Orda» bazary janyndaǵy estakadanyń qurylysy jyl sońyna deıin aıaqtalady
ALMATY. QazAqparat - «Qazavtojol» ulttyq kompanııasynda Almatydaǵy «Altyn Orda» bazarynyń janyndaǵy estakadanyń qurylys jumystary qalaı júrip jatqany aıtyldy, dep habarlaıdy QazAqparat tilshisi.
«Qazirgi ýaqytta «Almaty-Bishkek» tas jolynyń «Altyn Orda» bazary janyndaǵy ýchaskesinde kúrdeli jóndeý jumystaryn iske asyrý sheńberinde negizgi jumystar basty magıstraldyq estakadada júrgizilýde. Oǵan 215 adam, 30 birlik tehnıka jumyldyrylyp, túngi aýysym uıymdastyryldy. Jumystar táýlik boıy júrgizilýde»,- dep málimdedi ulttyq kompanııanyń baspasóz qyzmeti.
Qazirgi ýaqytta estakadanyń sol jaǵyndaǵy aralyq qurylystardy quıý jumystary tolyq aıaqtaldy. Endi arqandardy tartý jumystary júrgizilýde. Sondaı-aq, monolıtti plıtany quıý jáne asfaltbeton jabynyn salý jumystary bastaldy.
Estakadanyń oń jaǵynda monolıtti aralyq qurylysty quıýǵa arnalǵan metall konstrýktsııalaryn montajdaý jumystary júrýde. Monolıtti aralyq qurylystyń betonyn quıýǵa arnalǵan qalyptardy montajdaý jumystary bitýge jaqyn.
«Monolıtti aralyqty betondaý jumystarynyń kóbi aıaqtaldy. Jalpy 1200 metr konstrýktsııanyń búginde 194 metri ǵana qaldy. Ary qaraı jabyndy ornatý jumystary júredi»,- dep naqtylady «QazAvtoJol» ókilderi.
Basty magıstraldyq estakada jumystarynan bólek, kópirdiń kireberisterinde jol kıiminiń qabattaryn ornatý jumystary júripjatyr.
«Betondaý jumystary aıaqtalǵan soń, qurylys normalary men erejelerine, sondaı-aq, jumys jobasyna sáıkes, konstrýktsııanyń statıkalyq jáne dınamıkalyq synaqtary bastalady. Osydan soń magıstraldyq estakada boıynda jol júrýdi qamtamasyz etý josparlanýda»,- dep atap ótti kompanııada.
Buǵan deıin Indýstrııa jáne ınfraqurylymdyq damý vıtse-mınıstri Berik Kamalıev atalǵan jolaıryqtaǵy qurylys jumystary qazan aıynyń sońyna deıin tolyq aıaqtalatynyn aıtqan bolatyn.
