Almatyda altyn men aqsha urlaǵan bir top baýkespe ustaldy
ALMATY. QazAqparat - Almatylyq polıtseıler páterlerdi tonap júrgen urylardy ustady, dep habarlaıdy QazAqparat tilshisi.
Polıtsııa qyzmetkerleriniń aıtýynsha, top músheleriniń úsheýi 32-45 jas aralyǵyndaǵy shetten kelgen er adamdar, sonyń ekeýi buryn urlyq úshin sottalǵan bolyp shyqty. Olardy ustaý boıynsha arnaıy operatsııa keshe Almaly aýdanynda júrgizildi.
«Anyqtalýynsha, kúndiz páter ıeleriniń úıde bolmaıtynyn paıdalanyp, kúdiktiler qalanyń qaq ortasyndaǵy turǵyn úı keshenindegi páterlerdiń birine urlyqqa túsip, altyn buıymdar men iri mólsherdegi aqshany qoldy etken», - deıdi Almaty qylmystyq polıtsııa basqarmasynyń bastyǵy Esen Ysqaqov.
Onyń aıtýynsha, operatsııa kezinde urylar jasyrynyp úlgergen, biraq olardyń Turǵyt Ózal jáne Qarasaı batyr kósheleriniń qıylysynda toqtatylǵan mashınasynan zattaı aıǵaqtar tabylǵan.
«Osy derek boıynsha QR Qylmystyq kodeksiniń 188-babynyń 3-bóligine sáıkes sotqa deıingi tergep-tekserý bastaldy», - deıdi E. Ysqaqov.
Basqarma bastyǵy osy qylmystyq toptyń osy sııaqty taǵy úsh qylmysy dáleldengenin jetkizdi. Qazir qylmystyq top músheleriniń bári ustalyp, tergeý oqshaýlaǵyshyna qamaldy.
Tergeý amaldary júrip jatyr.
