Almatyda «Altyn qalam» serııasymen 12 birdeı kitap jaryq kórdi
Y. Qarashanyń 18-i. QazAqparat /Názıra Eleýhan/ - Búgin Almatyda Qazaqstan Jazýshylar Odaǵynda «Nur Otan» HDP Tóraǵasynyń birinshi orynbasary Darhan Káletaevtyń aqyn-jazýshylarmen, ǵalymdarmen, depýtattarmen, óner jáne mádenıet qaıratkerlerimen kezdesýi ótti. Kezdesý barysynda Qazaqstan Jazýshylar Odaǵynyń 75 jyldyǵy aıasynda, «Nur Otan» partııasynyń tikeleı qoldaýymen jaryq kórgen «Altyn qalam» serııasymen shyqqan kitaptardyń tusaý keseri bolyp ótti,
dep habarlaıdy QazAqparat.
«Bıyl Qazaqstan Jazýshylar Odaǵyna, qasıetti qarashańyraqqa ekinshi ret kelip otyrmyn. Biz Jazýshylar Odaǵymen árqashan tyǵyz baılanystamyz. Partııamyzdyń tóraǵasy N.Á.Nazarbaev únemi qazaq ádebıeti ókilderine qamqor jasap júredi. Búgingi tusaý keser - Elbasynyń tapsyrmasy. Tapsyrmany oryndaý maqsatynda, sonymen qatar Jazýshylar Odaǵynyń 75 jyldyq mereı toıy qarsańynda syılyq retinde osyndaı joba jasadyq. Jalpy, mundaı jobalar qalyptasqan júıe bolýy kerek», dedi «Nur Otan» HDP Tóraǵasynyń birinshi orynbasary Darhan Káletaev.
«Altyn qalam» serııasynyń maqsaty - ult mádenıetiniń máıegi, dińgegi sanalatyn qazaq ádebıetin nasıhattaý, jańǵyrtý, damytý bolyp tabylady. Osy izgi bastamanyń aıasynda qazaq ádebıeti klassıkteriniń 12 kitaby jaryq kórdi. Jaryqqa shyqqan shyǵarmalardyń barlyǵy qazaq ádebıetiniń altyn qorynan oryn alatyn ozyq ádebı týyndylar. «Nur Otan» partııasymen birlesip qolǵa alǵan jobanyń nátıjesi retinde búgin halqymyzdyń birtýar uldary M.Jumabaev, J.Aımaýytov, S.Toraıǵyrov, S.Seıfýllın, І.Jansúgirov, B.Maılın, M.Áýezov, S.Muqanov, Ǵ.Músirepov, Ǵ.Mustafın, Q.Amanjolov, M.Maqataev sekildi klassıkterdiń bir-bir tomdyq tańdamalylary alǵashqy serııamen shyǵyp, oqyrmandarǵa jol tartý aldynda tur. «Óldi deýge bola ma oılańdarshy, ólmeıtuǵyn artynda sóz qaldyrǵan» dep uly Abaı danamyz aıtqandaı, dańqty qalamgerlerdiń kitaptary ár oqyrmannyń tórinen tabylar degen oıdamyn», dedi «Altyn qalam» aqyldastar alqasynyń tóraǵasy, joba jetekshisi, Qazaqstan Jazýshylar Odaǵynyń tóraǵasy, kórnekti aqyn, dramatýrg, memlekettik syılyqtyń laýreaty, Qazaqstan Respýblıkasynyń eńbek sińirgen qoǵam qaıratkeri Nurlan Orazalın.
«Altyn qalam» serııasynyń ereksheligi - bul serııanyń aıasyna naqty tarıhta qalatyn, ádebı orta, oqyrman moıyndaǵan jaýhar týyndylar ǵana toptastyrylǵan. Alǵashqy serııaǵa HH ǵasyrdyń uly jazýshylary, qazaq ádebıetiniń klassıkteri, kórkem sózdiń qaıtalanbas sheberleri, kórnekti, dúldúl aqyndardyń eń tańdaýly óleńderi men shyǵarmalary enip otyr. Kezdesýde kitaptardyń tusaý keserimen qatar qazirgi qazaq mádenıeti men ádebıetiniń jaı-kúıi, bolashaǵy talqylandy.
