Almatyda «Altyn Qalam» ádebı baıqaýynyń jeńimpazdary anyqtaldy
ALMATY. 9 Qarasha. QazAqparat /Názıra Eleýhan/- Almatyda "Altyn qalam" baıqaýy máresine jetti. Keshe ádebı baıqaýdyń jeńimpazdary saltanatty marapattaý rásiminde jarııalandy.
Esterińizge sala ketsek, baıqaý 1 maýsymda jarııalanyp, 1 qyrkúıekke deıin ótken bolatyn. Barlyq shyǵarmalar arzy.kz. saıtynda qabyldandy. Baıqaýǵa elimizdiń ár óńirinde turatyn jas jazýshylar men aqyndar qatysty. Olar úsh irikteý kezeńinen ótti.
Uıymdastyrýshylardyń aıtýynsha baıqaýǵa kásipqoı jazýshylar qatyspaǵan. Úsh aıdyń ishinde arnaıy ashylǵan saıtqa 72 avtordan 92 shyǵarma kelip túsken. Alǵashqy shyǵarmalardy oqyrmandar talqylap, kóp oqylǵan ádebı shyǵarmalar baıqaýdyń kelesi kezeńine ótkizildi, onan soń lıderlik top qarap shyǵyp, ár kórkem týyndyǵa óz pikirlerin jazdy. Osylaısha aqtyq márege jetken úmitker-týyndylar qazylar alqasyna usynylǵan. Baıqaýǵa usynylǵan shyǵarmalar bes atalym boıynsha qabyldandy.
Sonymen, elimizdiń rýhanı-mádenı damýyna Qazaqstan azamaty retinde óz úlesterin qosý jáne jas talanttar men jańa esimderdiń qalyń jurtqa tanylýyna yqpal etý maqsatynda ótkizilgen baıqaýdyń «Jyldyń úzdik prozasy» atalymy boıynsha, "Kósh" shyǵarmasynyń avtory Dýman Ramazan jeńimpaz atandy. «Jyldyń úzdik poezııasy» atalymy boıynsha Aqberen Elgezektiń "Seni súıý" týyndysy úzdik dep tanylsa, «Jyldyń úzdik dramatýrgııasy" atalymy boıynsha Baıǵalı Esenalıevtyń "Qandy azý" shyǵarmasy eń úzdik dramatýrgııalyq shyǵarma dep tanyldy. Al, «Jyldyń úzdik balalar shyǵarmasy» atalymy boıynsha "Ádep" áńgimesiniń avtory Qalqaman Sarınge birinshi oryn berildi. «Jyldyń úzdik iskerlik jáne ǵylymı eńbegine» qatysty eńbekter az túskendikten oǵan bul joly eshqandaı syılyq taǵaıyndalmady. Jeńimpazdarǵa baǵaly syılyqtarmen arnaıy dıplomdar tabys etildi.
Uıymdastyrýshylardyń aıtýynsha endi aqtyq márege shyqqan avtorlardyń týyndylary «Altyn qalam» ádebı júldesiniń alǵashqy jınaǵyna engiziledi. Jańa jınaq Qazaqstan Respýblıkasynyń Táýelsizdigi merekesine oraı jeltoqsan aıynyń ortasyna taman jaryq kórmek.
"Ádebıet qoǵamda rýhanı ortany qalyptastyratyn mádenıettiń ajyramas bir bóligi. Qazir elimizde qazaq tilinde satylatyn kitaptardyń sany 5 paıyzdy quraıdy. Búgingi tańda avtorlar da, qyzyqty shyǵarmalar da jetkiliksiz. Týyndy avtorlary óz kitaptaryn ózderi shyǵarýda, al jas jazýshy úshin bul úlken másele. Oqyrmandar tańdaǵan talantty avtorlarǵa kitap basýshylar nazar aýdarady dep úmittenemin",-dedi ádil-qazylar alqasynyń múshesi, uıymdastyrýshylardyń biri Qýat Dombaı.
Aqyn, «Jazýshy» baspasynyń dırektory Esenǵalı Raýshanovtyń aıtýynsha bul baıqaý- el mádenıet ómirindegi jaqsy jańalyq. "Ol eń aldymen qazaq ádebıeti men mádenıetiniń bolashaǵy zor ekendigin kórsetti. Sol úshin, jas aqyndar men jazýshylardy qoldaǵandary úshin uıymdastyrýshylarǵa alǵysymdy bildiremin. Baıqaýdan ózindik kózqarasy men erekshe stıli bar birshama avtorlardy baıqadym. Bul baıqaý tasada qalyp qoıǵan aqyn, jazýshylarǵa aldaǵy shyǵarmashylyq ómirlerine jol ashady dep senemin", -dedi ol.
«Jyldyń úzdik balalar shyǵarmasy» atalymynyń jeńimpazy Qalqaman Sarın: "Baıqaý jas aqyndar men jazýshylarǵa ózin tanytýǵa berilgen úlken múmkindik. Eń bastysy meni ádebıetke kóńil aýdaryp jatqandary qýantty", dedi.
Baıqaý GSM Qazaqstan/Kcell uıaly baılanys operatorynyń demeýshiligimen ótti.
