Almatyda alty jolaqty basseın salynyp jatyr

Almaty ákimi sport nysandarynyń qurylys barysymen tanysqan kezde olardyń materıaldyq-tehnıkalyq jabdyqtalýyna jáne turǵyndar úshin qoljetimdi bolýyna erekshe nazar aýdardy.

Buqaralyq sportty damytý jáne megapolıste kásibı sport komandalaryn daıyndaý maqsatynda sporttyq ınfraqurylym belsendi túrde jańartylyp, nyǵaıtylyp jatyr.

Ortalyq mádenıet jáne demalys saıabaǵynda Almaty velosport federatsııasynyń qarjysy esebinen sporttyń osy túrin tanymal etý maqsatynda velotrektiń ınfraqurylymy modernızatsııalanyp jatyr.

Jańartylǵan velotrek balalar men jasósipirimderdiń jáne kásibı sporttyń damýyn jańa deńgeıge kóteredi, Almaty Cycling Team qurlyqtyq velokomandanyń daıyndyǵyn kúsheıtedi. Sonymen qatar, barlyq halyqaralyq talaptarǵa saı velotrek megapolıste ótetin jarystardyń kúntizbesin keńeıtýge múmkindik beredi.

Baqytjan Saǵyntaev beıimdeý-jattyǵý ortalyǵy, sport zaly men jabyq basseın salynyp jatqan «Halyqaralyq shańǵy tramplınderi kesheni» II kezeńin iske qosý barysymen tanysty.

Ámbebap jattyǵý zaly 580 orynǵa eseptelgen jáne kúres, fýtbol, voleıbol, basketbol jáne basqa sport túrlerine arnalǵan.

6 jolaqty 25 te 16 shaqyrym bolatyn jabyq júzý basseıni jartylaı olımpıadalyq qashyqtyqqa eseptelgen. Munda sport zal da qarastyrylǵan. Nysan kúzde paıdalanýǵa beriledi.

Bostandyq aýdanynda, Gagarın saıabaǵynyń soltústigine qaraı Champion jeke qorynyń qoldaýymen, qazirgi zamanǵy sport kesheniniń qurylysy bastaldy, onda múmkindigi shekteýli adamdar da jattyǵýlar jasaı alady. Aıaqtalýy kelesi jylǵa josparlanǵan.

Búginde Almatyda 3400-ge jýyq sport nysany, onyń ishinde 12 stadıon, sport saraıy, 14 sport kesheni men 12 sport ǵımaraty. Sonymen qatar megapolıste qurama komandalardyń 5 jattyǵý ortalyǵy, 3 shańǵy bazasy, 12 atý tıri, atý alańy, velotrek, sekirý tramplıni, 6 hokkeı korty jáne konkımen júgirý stadıony bar. 2671 tegis qurylymdar, 102 tennıs korty, ıppodrom, 10 sport maneji, 51 basseın, 483 sport zaly, 12 kiriktirilgen sport zaly bar.

Almatydaǵy jabyq sport ǵımarattarynyń jalpy alańy 81 503 sharshy metr. Bıyl olardy jergilikti bıýdjet esebinen kóbeıtý úshin qala shetinde jalpy alańy 38 myń sharshy metr bolatyn 6 dene shynyqtyrý-saýyqtyrý kesheni men tennıs ortalyǵy salynady. Jalpy ótkizý qabileti táýligine 5 250 adam. Sporttyq sektsııalar sany - 150.

Bıýdjetten tys qarjy esebinen 6 jańa sport nysanyn, onyń ishinde DSK, ústel tennısi ortalyǵyn, tennıs ortalyǵyn, kúres keshenin, «Suńqar» gımnastıka zaly men sport keshenin salý josparda. Sporttyń 15 túrinen 70-ten astam sport sektsııalary ashylatyn bolady.

Jumys saparynyń sońynda qala ákimi «Dýman» shaǵyn aýdanyndaǵy joldardy kúrdeli jóndeý jumystarynyń barysymen tanysty. Uzyndyǵy 13,4 shaqyrym bolatyn 29 kóshedegi kúrdeli jóndeý jumystary aıaqtaldy, asfaltbeton jamylǵysy tóselip, aryq jelileri men trotýarlar jasaldy. Uzyndyǵy 14 shaqyrym bolatyn qalǵan 24 kóshege asfalt tóseý jumystary júrgizilýde, aıaqtalýy kúzge josparlanǵan.