Almatyda alty aıdyń ishinde qaterli isikpen aýyratyn naýqastar sany ósken

Almaty qalalyq onkologııalyq ortalyqtyń dırektory Nursultan Іzmaǵambetovtyń aıtýynsha, Almaty onkologııalyq ortalyǵynda emdeletin naýqas sany jyl sanap artyp keledi.

«2016 jyly emdelgen naýqastardyń sanyna bıyl alty aıda jetip otyrmyz. Alty aı ishinde AOO hırýrgııalyq bólimshelerinde 1 300-den astam hırýrgııalyq aralasý jasaldy, bul ótken jyldyń sáıkes kezeńimen salystyrǵanda 95 ese kóp. Hımıoterapııalyq em alǵan naýqas sany 8 372-ge ósken (2022 jyly – 7810 boldy). Sáýlelik terapııa bóliminde 523 onkologııalyq naýqasqa 9632 sáýlelik terapııa seansy júrgizildi. Ambýlatorlyq hımıoterapııa kabıneti jaǵdaıynda birinshi jartyjyldyqta 4765 naýqas ambýlatorlyq em aldy. Qaterli isikke kúdikti jáne onkologııalyq naýqastarǵa 260 myńnan astam dıagnostıkalyq zertteý, atap aıtqanda, KT, MRT, endoskopııalyq zertteý, ÝDZ, tsıtologııalyq zertteýler jáne t.b. júrgizildi. Ótken jyly 215 000-ǵa jýyq boldy», - deıdi Nursultan Іzmaǵambetov.

Sondaı-aq 2694 naýqas anyqtalyp, esepke alynǵan, 2022 jyldyń 6 aıynda – 2363 naýqas boldy. Qaterli isik ishinde sút bezi obyry birinshi, toq ishek isigi ekinshi, ókpe qaterli isigi úshinshi, asqazan obyry tórtinshi orynda.

«Jalpy búginde Almaty onkologııalyq ortalyǵynda 30 699 onkologııalyq naýqas esepte tur (2022 j. 6 aıda – 28 415), ósim – 8 paıyz. Qazaqstannyń basqa óńirlerinen patsıentterdiń Almatyǵa kelip, qalalyq onkologııalyq ortalyq jaǵdaıynda joǵary sapaly medıtsınalyq kómek alyp, statsıonar jaǵdaıynda ambýlatorııalyq-emhanalyq dári-dármekpen úzdiksiz tolyq qamtamasyz etilip jatyr. Tek jyl basynan beri elimizdiń ózge óńirlerinen 420 naýqas Almaty qalasyna aýystyrylǵan. Ókinishke qaraı, árbir besinshi naýqas aýrýdyń asqynǵan satysymen esepke alynady. Bul rette qaterli isik aýrýyn erte anyqtaý ómirdi saqtaıtynyn taǵy bir eske salǵym keledi», - dedi Almaty qalalyq onkologııalyq ortalyqtyń dırektory Nursultan Іzmaǵambetov.