Almatyda alma baǵyn órtep jibere jazdaǵan adam ustaldy
ALMATY. QazAqparat – Almatydaǵy taý bókterinde shyqqan órtke sebepker bolǵan adam anyqtalyp, jaýapkershilikke tartyldy, dep habarlaıdy QazAqparat tilshisi.
43 jastaǵy er adam Bostandyq aýdanynyń Baqtygereev kóshesindegi úıine qorshaý jasamaq bolǵan.
«Ol óz kinásin moıyndady. Qorshaý jasaıtyn temirdiń elektr quralymen kespek bolǵanda, qurǵaq shópke ushqyn tıgen. Sonyń kesirinen 0,8 ga aýmaq órtendi. Alaıda ol órtti sóndirýge tyryspaǵan. Órt sóndirýshilerdi basqa adamdar shaqyrǵan. Sonyń arqasynda 20 ga aýmaqtaǵy baqty órtten saqtap qaldyq», - dedi TJD baspasóz qyzmetinen.
Er adam salǵyrttyǵy úshin ákimshilik jaýapkershilikke tartyldy.
Aıta ketý kerek, búgin Bostandyq aýdanynda aýmaǵy 20 gektar alma baǵy men saıajaı úıleri órtenip kete jazdady. Al, keshe Medeý aýdanyndaǵy Bolaı taýynda (Mohnatka) órt shyqqan bolatyn.
