Almatyda alma aǵashtaryn zańsyz keskenderge qylmystyq is qozǵaldy
ALMATY. QazAqparat - Almatydaǵy «Kamenskoe plato» observatorııasynyń janynda alma aǵashtary zańsyz otalyp, qurylys bastaldy, dep habarlaıdy QazAqparat tilshisi.
Onyń vıdeosy áleýmettik jelide tarady.
Beınejazbadan arnaıy tehnıkanyń aǵashtardy qulatyp, júk kólikterine tıep jatqanyn kórýge bolady.
Almaty qalalyq jasyl ekonomıka basqarmasy bul aqparatty rastady.
«Áleýmettik jelilerge monıtorıng júrgizý barysynda Medeý aýdany Observatorııa kóshesi, 5a mekenjaı boıynsha alma baqtaryn kesýge qatysty aqparat anyqtaldy. Almaty qalasy jasyl ekonomıka basqarmasynyń qyzmetkerleri Medeý aýdandyq polıtsııa basqarmasymen, sondaı-aq mamandandyrylǵan tabıǵat qorǵaý prokýratýrasymen birlesip, jedel túrde oqıǵa ornyna bardy. Tekserýge barǵan kezde 21 alma aǵashynyń kesilgeni rastaldy. Tekserý aktisi jasalyp, 500 AEK shyǵyn eseptelip, tıisti sharalar qabyldaý úshin polıtsııa departamentine hat joldandy»,- deıdi basqarma ókilderi.
Qazirgi ýaqytta bul másele boıynsha qalalyq polıtsııa tekserý jumystaryn bastady. Alma aǵashtaryn zańsyz keskeni úshin qylmystyq is qozǵady.
«Medeý aýdandyq anyqtaý bólimi QR QK 340-baby boıynsha «Aǵashtar men butalardy zańsyz kesý, joıý nemese búldirý» boıynsha qylmystyq is qozǵady»,- dep habarlady vedomstvadan.
