Almatyda alıment tólemeı qashyp júrgenderden 30 mln teńge óndirildi
ALMATY. QazAqparat - Ótken jyly Almatyda alıment tólemegen 58 boryshker ákimshilik jaýapkershilikke tartyldy. Bul týraly Almaty qalalyq ádilet departamentiniń ákimshilik tájirıbe boıynsha aýmaqtyq bóliminiń jetekshisi Laýra Abýova aıtty, dep habarlaıdy QazAqparat tilshisi.
«Alıment tóleýdi qamtamasyz etý úshin jumys isteıtin ata-analar (qamqorshylar) qajet. Osylaısha, jumys istemeıtin boryshkerlerdi jumysqa ornalastyrý úshin departament Jumyspen qamtý ortalyǵymen birlesip, Yntymaqtastyq týraly memorandýmǵa qol qoıdy. Sondaı-aq, karantındik sharalardy eskere otyryp, boryshkerlerdi jumysqa ornalastyrýǵa arnalǵan bos jumys oryndar jármeńkeleri uıymdastyryldy. Oǵan 15-ten astam iri kompanııa qatysty», - dedi ol.
Bul jármeńkelerdiń nátıjesinde 57 boryshker jumysqa turdy.
Jumystar ártúrli baǵytta, sondaı-aq, eńbekaqysy 150 myń teńgeden asatyn esepshi, ekonomıst, kúzetshi, júrgizýshi, qurylysshy jáne basqa da mamandyqtar usynyldy.
Laýra Ábýovanyń aıtýynsha, keıbir boryshkerler qandaı da bir ishki senimi men sebepterge baılanysty alıment tólegisi kelmeıdi.
«Bul - erli-zaıyptylar arasyndaǵy janjal, bir-birine degen renish jáne basqa bolýy múmkin. Osyǵan baılanysty departament balalarymyzǵa degen jaýapkershilikti arttyrý maqsatynda azamattarymyzǵa psıhologııalyq qoldaý kórsetýdi josparlap otyr. Bizdiń oıymyzsha, alıment tóleýshi ata-ana bul tek materıaldyq kómek emes, eń aldymen, bul balaǵa degen qamqorlyqtyń kórinisi ekenin bilýi kerek. Sebebi, bala óse kele ata-anasynyń qamqorlyǵyn, qadir-qasıetin jáne erteńgi kúnge degen senim berip jatqanyn túsinedi», - dedi spıker.
2021 jyly Almatyda 45-ten astam otbasynyń ata-anasy qaıta tabysyp, alıment tóleý máselesi ózekti bolmaı qaldy.
Sondaı-aq, ótken jyly 103 bitimgershilik kelisim jasalǵan.
Sonymen qatar, 2021 jyly alıment óndirý boıynsha 58 boryshker ákimshilik jaýapkershilikke tartyldy.
Bes táýlikke deıin 30 ákimshilik qamaqqa alý sharasy qoldanyldy.
Qylmystyq jaýapkershilikke 6 boryshker tartyldy. Alıment óndirip alý boıynsha boryshkerler 30 mıllıon teńgeden astam qarajat tóledi.
