Almatyda alıment tólemegen 81 áke qamaýǵa alynǵan
ALMATY. QazAqparat – Almatyda jyl basynan beri alıment tólemegen 141 áke ákimshilik jazaǵa tartyldy. Mundaı statıstıkany qalalyq Ádilet departamentiniń basshysy Abaı Arap Óńirlik kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat tilshisi.
Onyń aıtýynsha, alımentti óndirip alý áleýmettik mańyzdy sanatqa jatady jáne ol vedomstvonyń erekshe baqylaýynda.
Bıyl ádilet departamenti 141 boryshkerdi ákimshilik jaýapkershilikke tartty, 81 adam ákimshilik qamaýǵa alyndy.
Alıment boıynsha 4 boryshker qylmystyq jaýapqa tartyldy, sot oryndaýshylarynyń 4 usynysy anyqtaý organdarynyń qaraýynda.
«Boryshkerler 50 mln teńgeden astam bereshekti tóledi, osylaısha departament sot aktilerin oryndaý jónindegi mindetterdi sheship, aldaǵy ýaqytta da isterdiń áleýmettik mańyzdy sanattaryn naqty oryndaý úshin jumys isteı bermek»,- dedi ol.
Aıtýynsha, bereshegi, múlki bar boryshker bolǵan jaǵdaıda sot oryndaýshylary olardy iske asyrý jóninde shara qabyldaıdy.
«2022 jyly sot oryndaýshylary bereshekti óteý esebinen 3 jyljymaıtyn múlik, 7 jyljymaly múlik satty, sol arqyly 20 mln teńgeden astam bereshek óteldi»,- dedi Abaı Arap.
Budan bólek, bıyl 50-den astam otbasy qaıta qosylyp, alıment tóleý máselesi joıyldy.
