Almatyda «Álıhan Bókeıhanov. Dáýir adamy» kitabynyń tusaýkeseri ótti
Kitap avtory Reseılik azamat, tarıh ǵylymdarynyń doktory, professor, Sibir basqarý jáne buqaralyq kommýnıkatsııalar akademııasynyń teń quryltaıshysy jáne rektory Vıktor Ivanovıch Kozodoı.
Ǵalymnyń aıtýynsha, Alash qaıratkeri Álıhan Bókeıhanov jaıly eńbegin muraǵattan alynǵan aqparattarǵa súıene otyryp jazǵan.
«Qazaqstannyń belgili tarıh ınstıtýtynda kitabymnyń tusaýkeserin ótkizý men úshin zor mártebe. Kitap jazýdaǵy basty maqsatym reseılik oqyrmandardy qazaqtyń asyl tulǵasy Álıhan Bókeıhanovpen tanystyrý boldy. Kitapqa «Álıhan Bókeıhanov. Dáýir adamy» degen at qoıdym. Nege? Sebebi, Álıhan Bókeıhanovtaı tarıhı tulǵany bir dáýirmen teńestirýge bolady»,-dedi ol.
Sondaı-aq, kitap avtory Alashorda úkimetiniń jetekshisi týraly biri bilse, biri bile bermeıtin derekterdi de óz týyndysyna qosqanyn aıtty.
Sh.Ýálıhanov atyndaǵy Tarıh jáne etnologııa ınstıtýtynda ótken saltanatty sharaǵa ǵalymdar, saıasattanýshylar, tarıhshylar, ólketanýshylar, BAQ ókilderi qatysty.
Shara barysynda QR Ulttyq ǵylym Akademııasynyń Vıtse-prezıdenti, fızıka-matematıka ǵylymdarynyń doktory, professor Maqsat Qalımoldaev kitap avtoryna Qurmet gramotasyn tabystap, ústine shapan japty.
